Preseadis e Preseâts

Al è cun plasê che Us segnalìn lis iniziativis

3 di Avrîl dal 2016:

GardiscjE capitâl
de patrie dal friûl

la celebrazion uficiâl dai 939 agns de patrie
E TACHE aes 10.30 di matine.

Ai 3 di Avrîl dal 1077, a Pavie, l'imperadôr Indrì IV al decretave la nassite dal Stât Patriarcjâl furlan. Ogni an il 3 di Avrîl al rapresente duncje un moment impuartant pe comunitât furlane, une vere fieste par memoreâ e par tornâ a pensâ in clâf moderne aes formis di autoguvier e di rapresentativitât che, par tancj agns, a àn caraterizât la Patrie dal Friûl.

La celebrazion uficiâl de Fieste de Patrie dal 2016
che si tignarà a Gardiscje, in provincie di Gurize, e scomence
ai 2 di Avrîl cun "Sglaçât", il spetacul teatrâl in marilenghe
dal Teatro Incerto. Il program de zornade
dai 3 di Avrîl si vierzarà invezit li dal Teatri Comunâl Gnûf
cu la esposizion de bandiere dal Friûl e daûr la Sante Messe
in lenghe furlane celebrade dai trê Vicjaris dai Vescui furlans
intal Domo dai Sants Pieri e Pauli e compagnade de corâl
“Sacri Cantores Theresiani” direzude dal mestri Vanni Feresin.

Li dal Teatri Comunâl Gnûf si tignaran la celebrazion civîl, cu la leture de Bole costitutive dal Stât Patriarcjâl par cure de Compagnie Teatrâl
di Sante Marie di Sclaunic, i intervents des autoritâts, la proiezion in anteprime dal video di Dj Tubet (cun la regjie di Massimo Racozzi)
“No stâ a contâmi dome chê storie” e lis premiazions dal
concors pes scuelis “Emozions furlanis in viaç pal teritori”.

Ancje in altris lûcs dal teritori furlan, intai dîs de Fieste a vegnin fatis diviersis iniziativis. In atuazion des normis previodudis de Leç 6/2015,
di chest an e je la Agjenzie Regjonâl pe Lenghe Furlane a sostignî la realizazion di manifestazions culturâls pe celebrazion de “Fieste”
de bande di ents locâi in colaborazion cu lis Pro Loco e altris sogjets publics e privâts cence fins di vuadagn o finalitâts mutualistichis.

Fracant chi o podês lei il program complet de Fieste

lei online

Fracant chi o podês savê di plui sui finanziaments concedûts
ai ents locâi pes ativitâts de Fieste de Patrie dal Friûl

lei online

JO I SOJ: visantsi Pasolini

Il spetacul inedit pâr memoreâ Pasolini e la sô lenghe mari
in onde su Rai3
Domenie ai 20 di Març, aes 9.45

Al larà in onde domenie ai 20 di Març, aes 9.45 cirche,
su la tierce rêt a difusion regjonâl il spetacul ideât di Giovanna Marini
pai cuarante agns de muart dal inteletuâl furlan.
“JO I SOJ: visantsi Pasolini” al è costruît sul contrast fra il Pasolini dai ultins agns, madûr, ma ancje  sevêr e deludût, e chel zovin,
dal  periodi furlan, plen di stimui poetics e politics, vitâl,
impegnât, plen di ispirazions e creativitât.

Il spetacul al è stât rapresentât ae fin Novembar al Teatri di Rome
par dopo jessi presentât te suaze di "Suns Europe"
al Teatri Pasolini di Cjasarse ai 7 di Dicembar dal 2015, dulà che a son stadis fatis juste apont lis ripresis che a laran in onde domenie prossime. Cun Jugn e tacarà la la tournée internazionâl che e tocjarà
no dome la Italie ma ancje France e Belgjiche.
Il program al è prodot e diret di Valter Colle.

Il spetacul al sarà replicât miercus ai 23 di Març aes 21.10 cirche
su Rai 3 bis (Canâl 103 dal terestri digjitâl).