Preseadis e Preseâts

Al è cun plasê che Us segnalìn lis iniziativis

“Fieste de Patrie 2016"
UN concors pe realizazion
dal video uficiâl

“No sta a contâmi dome chê storie”
la colone sonore dal video al è il RAP CREâT DI DJ TUBET
par contâ LA STORIE DAL FRIÛL

La Agjenzie pe Lenghe Furlane e à domandât a Dj Tubet di creâ une cjançon par contâ la storie dal Friûl ai zovins. Pe realizazion dal video de cjançon, che al deventarà la imagjin promozionâl uficiâl de Fieste de Patrie dai 3 di Avrîl dal 2016, al partìs cumò un concors viert ai regjiscj.
A vignaran metûts a disposizion 7mil euros.
La consegne dal script e dal curriculum e je fissade dentri de date
dai 20 di Zenâr dal 2016.

"No sta a contâmi dome chê storie" e à tant che curnîs la storie di un soldât in trincee dilunc de I Vuere Mondiâl che, inte spiete dal gnûf ordin di atac, al ripasse lis tapis plui impuartantis de storie dal Friûl. I grops storics listâts a doprin tant che font il libri “La nestre storie” di pre Checo Placerean e, inte composizion de base rap, e je une citazion melodiche dal cinccent di Giorgio Mainerio: “Putta nera, bal furlano”. Il materiâl prodot di Dj Tubet, cun di plui, al è concepît come strument didatic pe divulgazion e la riflession storiche furlane.

Cjançon e bant di concors a puedin jessi scjariâts fracant chi 

“Marilenghe
e paisaç furlan”

Il gnûf lunari di A&T 2000 pe racuelte dai refudums
realizât in colaborazion cun la ARLeF

Dopo svariadis edizions dedicadis ai temis ambientâi, il lunari dal 2016 di A&T 2000, societât che e racuei i refudums di passe 40 comuns de provincie di Udin, al conte il Friûl par mieç de vôs di poetis e di scritôrs locâi. La iniziative e je nassude in colaborazion cu la ARLeF.
I tocs selezionâts de Agjenzie a son di autôrs contemporanis tant che Pierluigi Cappello, Maurizio Mattiuzza, Umberto Valentinis, Guglielmo Cerno (autôr di lenghe slovene), ma ancje poetis e scritôrs dal passât resint tant che Franco Marchetta, Dino Virgili, Angelo Maria Pittana, Siro Angeli, Amedeo Giacomini, Elio Bartolini, Maria Forte, Celso Cescutti.

Il lunari - dal dut bilengâl (furlan-talian) - al è stampât in 115 mil copiis. Al jentrarà tes cjasis e tes aziendis dai utents di A&T 2000 che a podaran cussì preseâ une produzion leterarie di valôr.

Fracant chi o podês savê di plui