Preseadis e Preseâts

Al è cun plasê che Us segnalìn lis iniziativis

dîs gnûfs libris par fruts
in lenghe furlane

lis propuestis a son il risultât
de colaborazion tra arlef e lis cjasis editoris

A son di pôc disponibii intes librariis dal teritori dîs gnûfs titui
in lenghe furlane, dedicâts ai fruts.
Lis propuestis, par variis fassis di etât, a son il risultât
de colaborazion tra la ARLeF e lis cjasis editoris
KappaVU, Corvino, Futura Edizioni e L'Orto della Cultura.

La seconde serie des golainis finanziadis de ARLeF
e smire a stimolâ la capacitât di vierzisi al mont
e la curiositât dai plui piçui pe diversitât linguistiche e culturâl
de regjon, ufrint aes scuelis e aes fameis materiâl di cualitât.

La golaine FAMEIS de KappaVU e propon
"Vanilie e soreli" e "Doi nonos scompagnâts",
doi libruts che a contin ai plui piçui i diviers mûts
di jessi famee inte societât contemporanie.

La golaine A OGNI FRUT IL SO LIBRUT, di Corvino Edizioni,
cui trê libruts "Ce fasino i amîs di UT?", "AUTun" e "MusicUTe",
e propon percors esploratîfs di cognossince e esperiencis adatis pai plui piçui, vuidâts dal simpatic protagonist GjatUt.

La golaine FREE&ULLI di Futura Edizioni e torne, invezit,
cui cuatri libruts indreçâts ai fruts plui picinins
"Stagjons", "Colôrs", "Pomis e verduris" e "Piçulis voris",
cu la comparse di un gnûf protagonist che al fevele par todesc, compagnant il furlan di Ulli e l'inglês di Free.

L'Orto della Cultura al è infin in librarie cul libri "MA par fortune"
che, cun ilustrazions cetant curadis, al è adat
sedi par fruts des primariis che pai plui piçui.

Par informazions, presentazions e/o laboratoris di leture,
si pues contatâ il Sportel Regjonâl pe Lenghe Furlane,
scrivint a: info@sportelfurlan.eu

Fracant chi, o podês savênt di plui

Isontina ambiente
e ARleF

insiemi cuntune gnove app
pe culture ambientâl in plui lenghis

Isontina Ambiente, la societât publiche che e gjestìs la racuelte dai refudums in 25 comuns de provincie di Gurize e in 3 de provincie
di Triest, e ARLeF a àn dât vite a une colaborazion par valorizâ
il plurilinguisim e l'ûs de lenghe furlane tes ativitâts davueltis de Aziende.

Cheste sinergjie e à puartât ae presentazion
di ISAPP, une aplicazion creade di Isontina Ambiente,
disponibile sedi par iOS che par Android,
une vore utile par vê simpri sot man la rispueste a ogni dubi
su la racuelte diferenziade, par cognossi il calendari dai conferiments
- diviers di comun in comun -  e par savê dulà che a son
i centris e lis isulis di racuelte.

La APP e je il strument che al à stiçât plui interès
ma tra lis novitâts presentadis al è ancje tant altri
materiâl di comunicazion, doprât ogni dì di une vore
di utents, dulà che e je protagoniste ancje la lenghe furlane,
tant che i adesîfs su lis cjampanis stradâls, la Riciclopedie
e il calendari distribuît tes cjasis.

Chel fat cu la Aziende, al è stât un percors une vore impuartant
par favorî l'ûs de de lenghe furlane inte suaze dal servizi public
di gjestion ambientâl, garantint la promozion
di une culture ambientâl e il rispiet dai dirits linguistics.

Fracant chi, o podês savênt di plui