Preseadis e Preseâts

Al è cun plasê che Us segnalìn la iniziative

“Zornade Internazionâl de Lenghe Mari”
conciert di Franco Giordani

Sabide ai 17 di Fevrâr, aes 21.00
alì dal Teatri San Giorgio di Udin

La ARLeF (Agjenzie regjonâl pe lenghe furlane) e anticipe di cualchi dì lis celebrazions pe Zornade Internazionâl de Lenghe Mari, che in dut il mont si celebre ai 21 di Fevrâr, organizant sabide ai 17 di Fevrâr une serade dedicade ae lenghe furlane e ae ricjece des sôs varietâts, ancje intes produzions artistichis.

L'event al varà tant che so cûr la musiche, lis peraulis, i suns e lis vôs
de lenghe e al previôt, tant che event principâl, il conciert di
Franco Giordani. Il cjantautôr furlan si esibirà aes 21.00, alì dal
Teatri San Giorgio di Udin, proponint lis cjançons che a son soredut tocs dal so ultin lavôr musicâl: Truòisparìs. Un lavôr complès che nus puarte, traviers di un reticul di “trois sparîts” (al è propit chest, di fat, il significât dal titul) intal cûr dal Cjanâl de Ciline, che lui stes al presente tant che
“tiere di mont, di aghis, di poetis e scritôrs”.
Protagoniste de serade e sarà la lenghe furlane cu lis sôs tantis
variantis e i siei tancj aspiets. L'intindiment, di fat, al è ancje chel di ufrî une serie di argoments par rifleti su la ricjece de marilenghe. Cemût convivino varietâts locâls e lenghe standard? In ce maniere une e insiore chê altre? Ce significât aial cressi cun plui lenghis?

Tra lis riflessions presentadis prime dal conciert, dopo chês di Federica  Angeli, cjargnele doc che e lavore tant che operadore linguistiche professionâl, o scoltarìn ancje la testemoneance preziose dal poete e scritôr Maurizio Mattiuzza. Mattiuzza, doprant cu la stesse abilitât il furlan dongje dal talian e dal dialet de Valsugana, che i è stât trasmetût de mari, al è deventât une des personalitâts plui significativis de leterature furlane contemporanie, vincidôr di impuartants premis di poesie,
tant che l'“InediTO – Premio Colline di Torino”, intal 2014,
e l'“Alda Merini” intal 2017.

Jentrade libare e gratuite.

Clicant chi o podês lei dut il program