Preseadis e Preseâts

Al è cun plasê che Us segnalìn lis iniziativis

“suns europe 2016”

AL GRUP STESO, DES ISULIS FÆR ØER, I PREMIS DE JURIE.
A VERONIKA USHOLIK, DE REGJON RUSSE ČUKOTKA, IL PREMI DAL PUBLIC

Suns Suns Europe 2016 si è riconfermât tant che il festival plui impuartant des arts in lenghe minoritarie, un moment straordenari di contaminazion culturâl e linguistiche, di nivel artistic cetant alt.
Tai trê dîs si è alternât un program fis di musiche, leterature, teatri e cines, cuntun public che i è stât tant daûr e che al à jemplât,
in maniere leterâl, il Teatri Giovanni da Udine.

Teatri al complet ancje pe emozionante serade conclusive dal festival,
che al à viodût a dâsi la volte sul palc 10 grups che a àn cjantât
in ancjetantis lenghis minoritariis di Europe.

«Pes vôs uçadis tant che rasôrs, epûr dolcis e ispiradis. Pai sunôrs profonts tant che oceans e pes atmosferis lontanis. Pal calôr che a àn puartât a Udin des lôr tieris dal Nord», il grup STESO des isulis Fær Øer, cun sonoritâts svoladiis e ipnotichis dal Nord profont, al à vinçût
il Premi de jurie di Suns Europe 2016. La jurie popolâr e à assegnât invezit la sô preference  a VERONIKA USHOILIK (Čukotka), la fantate
de vôs dorade. Al secont puest si è cualificât invezit GURUDE (Khakassia), che si ispire in maniere creative al cjant armonic de tradizion siberiane, e al tierç puest il grup BERDON (Ladinie).

Dilunc de serade finâl a son stâts conferîts ancje
il ricognossiment pe Sezion Cine – lât a Sume - Mumisitsinerup nipaà di Inuk Silis Høegh (Groenlande),
che al conte in lenghe Inuit une esperience umane specifiche e une fase tant impuartante de storie contemporanie de Groenlande – e,
pe Sezion Leterature, al scritôr Xavi Sarrià (Paîs Catalans).

Fracant chi o podês lei di plui

“Centri di documentazion didatiche pe lenghe furlane”

ARLEF E Societât Filologjiche Furlane insiemi par UN GNÛF
progjet strategjic di politiche linguistiche

La ARLeF Agjenzie Regjonâl pe Lenghe Furlane e la Societât Filologjiche Furlane a àn firmât il Protocol di Intese pal Centri di documentazion, ricercje e sperimentazion didatiche pe scuele furlane “Docuscuele”. 

Viert te sede de Societât Filologjiche Furlane a Udin, li che al è za cuasi un miâr di publicazions, il Centri al sarà un pont di riferiment pai insegnants impegnâts inte introduzion de marilenghe intai programs formatîfs dai istitûts dal teritori e al judarà a metiju intes cundizions di confrontâsi te suaze culturâl e in maniere professionâl cui coleghis, ancje di altris contescj talians minoritaris e europeans, e cun ducj i interlocutôrs interessâts ai problemis de scuele e de educazion.

La ARLeF e varà compits di direzion e di coordenament dal progjet e e metarà a disposizion dal Centri lis risorsis economichis pal so funzionament e pal disvilup dai varis programs che a saran soredut su la didatiche inovative e su la formazion.

Pal coordenament des ativitâts e pe realizazion dai obietîfs al è stât metût adun un Comitât tecnic, cun a cjâf Walter Tomada, li che a son dentri un rapresentant di ognidun dai sogjets aderents, e ancje trê esperts di dissiplinis leadis aes ativitâts dal Centri, nomenâts de ARLeF. 


Fracant chi o podês savê di plui

“arlef ancje su istagram”

Vignit daûr dal cuninut blanc furlan

ARLeF e à lançât il so profîl uficiâl su Instagram, la celebre rêt sociâl dedicade ae condivision des imagjins che simpri di plui e je daûr a jentrâ inte vite cuotidiane dai utents di dut il mont.
Subit dopo de creazion dal profîl, tantis personis a àn
scomençât  a stânus daûr.
Ven daûr dal cuninut blanc furlan ancje tu.

Fracant chi o podês colegâsi al profîl