Preseadis e Preseâts

Al è cun plasê che Us segnalìn lis iniziativis

“vicino/lontano 2016”

A UDIN DAI 5 AI 8 DI MAI, ma za dai 30 di avrîl
cul prefestival, plui zornadis di riflession
sui temis cruCiâi dal nestri timP

Di Joibe ai 5 a Domenie ai 8 di Mai dal 2016, cuntune anticipazion
che e tache ai 30 di Avrîl, al torne a Udin il festival vicino/lontano,
par lei il presint cul jutori de peraule e dal pinsîr.
I “dialics sul mont che al cambie”, ae 12e edizion, a trasformaran
lis salis e i spazis citadins in lûcs di dibatit e di confront
cun cuasi 100 apontaments dilunc di cuatri dîs.
Tal program, in graciis dal impegn de ARLeF a cressin ancje i apontaments dal Festival e prefestival che a fevelin par furlan: chest an a saran
fintremai 7, dedicâts a grancj e picinins. La Agjenzie e à ancje colaborât
pe version plurilengâl dal sît web che vuê si mostre dongje che par talian, ancje par furlan, sloven, todesc e inglês.


Fracant chi o podês discuvierzi dut il program de manifestazion

“doi apontaments speciâI dentri dal program di vicino/lontano"

Un laboratori creatîf par fruts cun 99 cjartis
par zuiâ cul furlan e tantis altris lenghis,
une storie di cuninuts,
che e pant il bon acet des diversitâts e
la curiositât par ogni culture e lenghe “diferente”

Miercus ai 4 di Mai, aes 6 sot sere in Casa Cavazzini a Udin, fruts e grancj a son invidâts ae leture musicâl dal libri “Flon-Flon & Musute” cu la vôs di Michele Polo, lis musichis di Leo Virgili e la proiezion animade des ilustrazions origjinâls dal libri di Elzbieta, vincidôr, intal 1996, dal premi Andersen.  Le storie, une vore delicade, e conte di doi amîs cuninuts che
a zuin simpri insiemi fin tal dì che e sclope la vuere e a chel pont no puedin viodisi plui parcè che Musute “e sta di chê altre bande de vuere”.
A intervegnin ancje Sonia Aita, Laura Nicoloso e Lorenzo Fabbro.

Sabide ai 7 di Mai, des 4 sot sere indevant, te Galarie Tina Modotti, Marcjât dal Pes, un laboratori creatîf par fruts che partint de scjate zûc
“99 peraulis Parlare col mondo/Fevelâ cul mont/Talking to the world” e des 99 cjartis dissegnadis dai fantats dal Centri Diurni Punto Zero, al puarte intal mont des peraulis e dai sunôrs cun ben 15 lenghis plui dutis chês che i fruts a zontaran fasint svolâ la imagjinazion, judâts di cjartis e di colôrs. Cun Patrizia Geremia de coop Futura e ARLeF.
Par partecipâ e je obligatorie la iscrizion, 30 puescj disponibii.
O podês notâsi telefonant al numar 0432 555812 o scrivint a e-mail: arlef@regione.fvg.it

Fracant chi o podês lei il program complet dai apontaments in furlan

“SETEMANE
DE CULTURE FURLANE”

DI JOIBE AI 5 A LUNIS AI 16 DI MAI, LA TIERCE EDIZION DE MANIFESTAZION inmaneade de SOCIETÂT FILOLOGJICHE FURLANE

A je rivade ae sô edizion n. 3 la Setemane de Culture Furlane, progjet che, daûr dal sucès des edizions dai agns passâts, si propon di ufrî
une rassegne di iniziativis amplie e interessante di incuintris, visitis, presentazions di volums, une maratone di leture par fruts in lenghe furlane e cunvignis par rapresentâ aspiets simpri gnûfs dal mont culturâl furlan,
cu la sô vivarositât e la sô complessitât.
La Setemane de Culture Furlane - inmaneade de Societât Filologjiche Furlane e realizade cu la colaborazion di une rêt di cetantis istituzions publichis e privadis, des scuelis e des bibliotechis – e propon ancjemò
une volte un program fat par cognossi al miôr il patrimoni di art,
di storie, di savês e di emozions dal nestri Friûl.


Fracant chi o podês lei il program