Preseadis e Preseâts

Al è cun plasê che Us segnalìn lis iniziativis

"Maman! ancje in edicule"

ogni vinars, su Il Friuli

In spiete de gnove edizion di Maman!,
la prime trasmission par fruts in lenghe furlane,
finanziade de Agjenzie Regjonâl pe Lenghe Furlane
e che e va in onde su Telefriuli, di cumò o podês cjatâ
lis sôs rubrichis ancje su Il Friuli.

Ogni vinars, corêt in edicule a comprâ il setemanâl Il Friuli
par no piedisi l'apontament su cjarte cun Daria Miani
e i siei zûcs, lis ricetis, lis detulis, lis cjançonutis
e tantis bielis sorpresis dedicadis ai plui piçui.

Tant colôr e divertiment, dut in lenghe furlane!


Fracant chi o podês tornâ a viodi dutis lis pontadis
de prime edizion di Maman!
lei online

cors di furlan par students de universitât
e zovins fin a 29 agns

inmaneât dal cirf

Il Centri Interdipartimentâl pal svilup de lenghe e de culture dal Friûl (CIRF) de Universitât dal Friûl al slargje la ufierte formative
inmaneant doi cors di furlan pai iscrits ae Universitât dal Friûl
e pai zovins fin ai 29 agns.

Lis lezions, che a consistin in 10 incuintris, par un totâl di 20 oris,
a trataran sedi aspiets linguistics che aspiets storics e culturâi.
Pai interessâts, dongje des lezions frontâls, a son in program ancje
visitis vuidadis a realtâts locâls.

La scree dai cors e je previodude pai 30 di Otubar dal 2017,
cuntune cerimonie che si fasarà aes 17.30,
te Sal dal Consei di Palaç Garzolini - di Toppo Wassermann.

La ativitât e gjolt dal patrocini de ARLeF,
Agjenzie Regjonâl pe Lenghe Furlane e de
Societât Filologjiche Furlane, cu la poie di Fondazione Friuli.

Par altris informazions e iscrizions si pues fâ riferiment
al sît dal CIRF o a chescj contats:
sportel.furlan@uniud.it 
cirf@uniud.it
tel. 0432 555648.

Fracant chi o podês savê di plui

Premi leterari
Caterina Percoto

sabide ai 21 di otubar la cerimonie di premiazion

Dopo cualchi an di sospension, al torne
il premi leterari "Caterina Percoto",
inmaneât de Aministrazion comunâl di Manzan
par onorâ la figure de scritore.

Il teme proponût ai candidâts, chest an,
al cjape ispirazion di une conte de autore furlane
e al è dedicât al leam che al unìs ogni persone ae sô tiere di nassite.

Il concors al previôt diviersis categoriis:
dôs pai adults e dôs pai zovins
e ducj i scrits a puedin jessi presentâts
sedi pat talian che par furlan.

Pe prime volte, in cheste edizion la jurie si compon ancje
di insegnants e figuris istituzionâls dal mont de lenghe furlane,
tant che Hellen Pittino, assessore ae Politiche Sociâl e ae Culture dal Comun di Manzan e il diretôr de ARLeF,
Agjenzie Regjonâl pe Lenghe Furlane, William Cisilino.

Par sotlineâ il desideri de jurie di dâ gnove vite al Premi,
la serade di premiazion che e sarà sabide ai 21 di Otubar, aes 20.15,
a Manzan, Foledor Boschetti - della Torre,
e varà tant che ospit di onôr il scritôr e poete Flavio Santi,
autôr di romançs tant che "Diario di Bordo della Rosa"
e "L’eterna notte dei Bosconero".