Preseadis e Preseâts

Al è cun plasê che Us segnalìn lis iniziativis

"941 agns de patrie
dal friûl"

a voleson darzin lis celebrazions uficiâls,
ai 8 di avrîl dal 2018

Chest an, la Fieste de Patrie dal Friûl
si fasarà tal Comun di Voleson Darzin, domenie ai 8 di Avrîl.

L'event al previôt un program une vore siôr:
te buinore si fasarà la Messe par furlan, cun leturis par sloven e todesc,
e la celebrazion civîl, cui intervents des autoritâts
e la leture de Bole imperiâl.

 Daspò des celebrazions uficiâls, si pues partecipâ
al gustâ convenzionât che si fasarà ducj insiemi
te mense des scuelis "Ersamo di Valvasone": e je obligatorie la prenotazion, dentri dai 4 di Avrîl, contatant l'Ufici IAT di Voleson Darzin,
dal martars ae domenie, des 10.00 aes 12.30 e des 14.30 aes 17.30.
Tel. 0434 898898, e-mail: info.valvasone@gmail.com

 Cu la stesse modalitât si podarà prenotâ il spetacul teatrâl
"Pachis e Patrie", che al larà in sene tal dopomisdì
intes salis dal Cjistiel di Voleson, cun cinc programazions.

Aes 16.00, e rivarà la Stafete des Lenghis Minoritariis dal Friûl,
che e sierarà la Fieste cuntun spetacul di tambûrs e di sbandieradôrs
dal “Grup Artistic Furlan”.

Fracant chi o podês lei dut il program intal detai
lei online

"Pachis e Patrie"

il spetacul teatrâl ideât di pueste
PE FIESTE DE PATRIE DAL fRIûL

Inte zornade des celebrazions de Fieste de Patrie dal Friûl,
intes salis dal cjistiel di Voleson Darzin,
al larà in sene il spetacul teatrâl itinerant
"Pachis e Patrie",
par cure di Matarans Academy, Piccola Scuola di Teatro per ragazzi
de "La Compagnia dei Guitti".

Ideât di pueste pe Fieste di Adriano Del Fabro e Samuele Cattarossi,
che al à curât il test, cu la regjie di Federico Scridel,
il spetacul al conte i fats sucedûts pardabon
inte gnot di Sant Martin dal 1582, inte planure furlane.

A son programadis cinc rapresentazions,
aes 14.30, aes 15.15, aes 16.00, aes 16.45 e 17.30,
pensadis tant che un percors a tapis che i spetatôrs a fasaran cui atôrs, dentri de curnîs medievâl sugjestive.

I puescj a son limitâts e e je duncje obligatorie la prenotazion
dentri dai 4 di Avrîl, contatant l'Ufici IAT di Voleson, dal martars ae domenie, des 10.00 aes 12.30 e des 14.30 aes 17.30.
Tel. 0434 898898, email: info.valvasone@gmail.com.

la stafete des lenghis minoritariis dal friûl

la seconde edizion de manifestazion sportive
de fieste de patrie dal friûl

Dopo dal sucès de prime edizion, a acompagnâ la Fieste
e torne la Stafete des Lenghis Minoritariis dal Friûl, manifestazion sportive promovude de Regjon F-VJ e de ARLeF e coordenade de
Associazione Maratonina Udinese.

E partirà sabide ai 7 di Avrîl di Aquilee e, daspò un percors di 118 chilometris dilunc di 20 comuns, e rivarà a Voleson Darzin,
ai 8 di Avrîl.
 
La Stafete e vûl rimarcâ in maniere simboliche la impuartance
des diviersis identitâts linguistichis presintis inte Patrie dal Friûl,
cu la presince di atletis furlanofons, slovenofons e gjermanofons
che a puartaran tant che testemoni il test de Bole Imperiâl.

Il sproc de manifestazion al è “La nestre Patrie, lis nestris lenghis-Naša Domovina, naši jeziki-Unsere Heimat, unsere Sprachen-La nostra Patria, le nostre lingue-Our Homeland, our languages”.
 
La Stafete des Lenghis Minoritariis e taiarà il travuart aes 16.00
intal plaçâl dal Cjistiel di Voleson Darzin e lis premiazions, acompagnadis
dal spetacul di tambûrs e di sbandieradôrs dal “Grup Artistic Furlan”,
a segnaran il sierâsi de Fieste de Patrie 2018.