Grafie uficiâl

La grafie uficiâl de lenghe furlane e je stade fate buine cul Decret dal President de Zonte regjonâl n. 392 dai 25 di Otubar dal 1996, su la fonde de propueste di grafie adotade ai 15 di Lui dal 1986 dal Consei de Provincie di Udin, adun cu lis Provinciis di Gurize e Pordenon. Plui tart la grafie uficiâl e je stade cjapade dentri tal art. 13 de Leç regjonâl 15/96.
Cun Decret dal President de Zonte regjonâl n.41 dai 07 di Març dal 2013 al è stât adotât il Regolament pe grafie des variantis de lenghe furlane, viodude la Gjeneralitât de Zonte regjonâl n. 2377 dai 28 di Dicembar dal 2012, stes argoment.

Obietîf de ARLeF al è ancje chel di “promovi la cognossince e l’ûs de grafie uficiâl de lenghe furlane in ogni ambit de vite sociâl”.

---

• LA LENGHE COMUNE

  La lenghe comune – clamade ancje standard o coinè – e je il model de lenghe scrite di riferiment par une comunitât linguistiche. Dutis lis lenghis che a àn di vê une uficialitât e che a àn di jessi insegnadis tes scuelis a scuegnin vê une forme comune. Come che la coinè taliane e je derivade dal toscan, tal câs dal furlan la lenghe standard si fonde sul furlan centrâl: chel doprât di Ermes di Colorêt (1622-1692), che al è stât cjapât di model di altris scritôrs e poetis.

• LA GRAFIE NORMALIZADE

  La grafie e je une rapresentazion scrite de lenghe midiant dal ûs di simbui.
  Si trate di une sielte convenzionâl che e permet a ducj di scrivi inte stesse maniere. Cuntune grafie uniche si pues insegnâ a lei e a scrivi daûr di un sisteme codificât di simbui. La grafie uficiâl de lenghe furlane e je stade fissade de leç regjonâl 15/1996 e confermade de leç regjonâl 29/2007.

• LIS VARIANTIS

  Il furlan, come ogni lenghe, al à i siei dialets e lis sôs variantis che a puedin jessi dutis rapresentadis midiant de grafie uficiâl.
  Lis variantis a vegnin dopradis intal ûs fevelât, inte poesie o in altris formis comunicativis che a presein la sogjetivitât dai autôrs. La lenghe comune e je doprade tant che complement de comunicazion, te uficialitât publiche, tes scuelis e tai tescj di scuele che no puedin jessi editâts tancj che a son lis variantis.

---