La edizion numar 48 e je stade realizade in colaborazion cu la ARLeF, che e à intervistât undis furlans che si son afermâts fûr dai confins de Patrie sul lôr rapuart cu la lenghe e la culture furlane
Lant daûr de tradizion, ai 13 di Dicembar dal 2023, dì di Sante Luzie, e je stade presentade la gnove edizion de Agenda Friulana, publicade di Chiandetti Editore dal 1976 indenant.
La edizion 2024, curade di Elisa Mauro, e je stade realizade in colaborazion cu la ARLeF – Agjenzie regjonâl pe lenghe furlane che, par analizâ la profonditât dal sens identitari, e à volût intervistâ undis furlans che si son afermâts fûr dai confins de Patrie. Ognidun di lôr al à contât dal so rapuart cu la lenghe e la culture furlane.
La strade segnade de Agjenzie midiant di chescj personaçs innomenâts e je chê di un viaç te identitât e tal Friûl, te lenghe e te culture dal teritori.
Intes pagjinis de Agenda Friulana, Francesca Bardelli Nonino (influencer de sgnape), Toni Capuozzo (gjornalist), Gloria Clama (chef, za concorinte di MasterChef), Manuela Di Centa (campione olimpiche), Antonello Dose (condutôr dal “Ruggito del coniglio” – Radio Rai 2), Mauro Ferrari (sienziât), Nives Meroi (alpiniste), Mara Navarria (campione olimpiche), Bruno Pizzul (gjornalist), Glauco Venier (musicist), Mary Jane (influencer e youtuber) a contin il lôr leam personâl cu la Patrie e cu la lenghe furlane, il sintîsi furlans ancje cuant che, in cualchi câs, si è lontans dal Friûl. Intes lôr peraulis o cjatìn i ricuarts, lis esperiencis e i moments di vite.
Il progjet Agenda Friulana 2024 al è stât patrocinât de ARLeF, de Confartigianato Udine e dal Ent Friûl tal Mont e al è stât metût in vore cu la colaborazion di Club per l’Unesco di Udin.
