Il “cjantôr contestoriis” di Italie, Angelo Branduardi, al sarà ospit de citât di Aquilee ai 17 e 18 di Lui prossims. Un dopli apontament, organizât dal Comun di Aquilee, ancje cu la colaborazion de ARLeF – Agjenzie regjonâl pe lenghe furlane.
Il cjantautôr e polistrumentist al è cognossût di fat ancje pe sô reinterpretazion innomenade de balade popolâr “Scjaraçule Maraçule”, atribuide a Giorgio Mainerio: musicist e predi, une figure emblematiche de complessitât scure e visionarie dal ’500 furlan, là che cult e popolâr si fondin intun misteri che no simpri si pues scandaiâ.
Branduardi, tra i cjantautôrs plui rivoluzionaris e inovatîfs dal panorame musicâl talian, cul so stîl unic e ricercjât, al à componût cjançons influençadis di musichis antighis, ma ancje di sonoritâts folk europeanis e americanis, in plui che dal rock progressîf. Al è un apassionât di musichis tradizionâls di dut il mont. Tal passât si è interessât ae musiche popolâr furlane. Cognossude la opare di Mainerio, al à fat une sô reinterpretazion, la famose “Ballo in fa diesis minore”.
Branduardi al sarà protagonist, lunis ai 17 di Lui, aes 8 di sere, inte sale consiliâr dal Comun di Aquilee, in place Garibaldi. Li al presentarà il so libri “Confessioni di un malandrino”, dialogant cul gjornalist dal Messaggero Veneto, responsabil des pagjinis di culture e spetacul, Oscar D’Agostino. Al presentarà la serade il sindic di Aquilee, Emanuele Zorino.
Invezit, la sere dopo, martars ai 18 di Lui, il cjantautôr si esibirà intun conciert, simpri a Aquilee, in place dal Cjapitul, des 9.30 di sere.
Ducj i doi i events a saran a jentrade libare.
Informazions e prenotazions: 389 2858620; aquileiachemusica@gmail.com
