In ocasion dai 150 agns de muart dal grant concitadin, Jacopo Pirona, la ARLeF (Agjenzie Regjonâl pe Lenghe Furlane), la Regjon Friûl – Vignesie Julie e il Comun di Dignan a àn prontât une schirie di iniziativis par memoreâ chest grant om de culture che al è nassût in chest paîs intal 1789. Cualchi iniziative e je za inviade, altris i vignaran daûr vie pai ultins mês di chest an e intai prins dal 2021.
La plui resinte e je peade a la cartelonistiche stradâl gnove. Cun di fat, intes cuatri stradis di acès al cjâf lûc dal Comun e je stade zontade une tabele che e marche la impuartance di chest pe comunitât di Dignan.
Presints il sindic, Orlando Vittorio, acompagnât dal vicesindic Luigi Toller, l’assessôr regjonâl aes lenghis minoritariis, Pierpaolo Roberti e il president de ARLeF, Eros Cisilino, a son stadis screadis lis targhis che a ricuardin cemût che Dignan al sedi il “Paîs di Jacopo Pirona, autôr dal prin vocabolari de lenghe furlane”.
Pai furlans, si capìs, “il Pirona” al è sinonim di vocabolari de lenghe furlane. Di fat, al fo propit l’abât Jacopo Pirona a completâ la prime version, publicade dopo de sô muart (intal 1871), di un vocabolari pal furlan. Insegnant des scuelis publichis, scritôr e linguist di fin, Pirona al jere in rapuarts di amicizie e stime cui plui innomenâts personaçs furlans dai siei timps, fra chescj: Prospero Antonini, Pieri Çorut, Gabriele Pecile e Pacifico Valussi. La sô rêt di cognossincis e lave, dut câs, ancje fûr dai confins furlans, tocjant ancje cualchidun dai studiôs talians e forescj plui cualificâts di cetantis dissiplinis. La prime edizion dal vocabolari (“capitale monumento della nostra parlata locale”) al fo completât cul jutori dal nevôt Giulio Andrea (ancje lui nassût a Dignan) e stampât a Vignesie. Cualchi an plui tart, il stes nevôt, adun cun Ercole Carletti e Giovanni Battista Corgnali, a publicarin “Il nuovo Pirona” (a Udin, intal 1935). I rescj di vîf di Jacopo Pirona (muart intal 1870), a polsin intal cimitieri monumentâl di Udin.
