Presentade la version furlane dal sît de ASU FC e il video realizât pe ADMO che al spieghe ai zovins il valôr de donazion de medole dai vues
La lenghe furlane tant che mieç di comunicazion par jessi simpri plui dongje dai citadins intal setôr sanitari e sociâl. Chest al è stât il teme de conference stampe clamade dongje de Regjon F-VJ e de ARLeF par presentâ doi progjets impuartants: la version par furlan dal sît istituzionâl ASU FC e il video, realizât pe Admo Fvg, cui fantats di YoupalTubo che a invidin i coetanis a notâsi tal Regjistri nazionâl talian dai donadôrs di medole dai vues.
IL SÎT DE ASU FC PAR FURLAN
La version par furlan dal sît de Aziende sanitarie universitarie dal Friûl di Mieç e je une novitât impuartante e in linie cu lis indicazions dal “Plan gjenerâl di politiche linguistiche pe lenghe furlane 2021-2025”. Al è un imprest impuartant par dialogâ e par dâ informazions utilis ae utence che e fevele furlan (a son passe 500.000 i citadins che a fasin riferiment ai Distrets sanitaris di Udin, Cividât, Codroip, Glemone, Tisane, Palme, San Denêl, Tarcint e Tumieç) e che si zonte a altris azions impuartantis di comunicazion plurilengâl metudis in cjamp de Regjon, tant che lis campagnis di vacinazion cuintri de influence. La colaborazion tra ASU FC e ARLeF e à puartât ae traduzion furlane des sezions plui consultadis de utence (contignûts simii a son ufierts in lenghe slovene e todescje) e a son za in program altris inzornaments dopo dal restyling dal sît de Aziende sanitarie.
Cheste colaborazion e à puartât ancje une altre azion di comunicazion plurilengâl significative: di cualchi mês, di fat, i maxischermis dal paveon di jentrade dal ospedâl Sante Marie de Misericordie di Udin a ufrissin ai utents informazions sanitariis e di servizi ancje in lenghe furlane.
Pe Aziende che e rapresente il teritori de ex provincie di Udin, vê il sît istituzionâl ancje inte lenghe dal contat cuotidian e des personis di cheste tiere al è impuartant: cjatâ intun servizi – soredut se si trate di salût – un leam identitari al è fondamentâl.
IL VALÔR DAL DONÂ LA MEDOLE DAI VUES CONTÂT MIDIANT DI YOUPALTUBO
YoupalTubo al è il canâl YouTube cun protagoniscj un grup di fantats furlans. Midiant dal canâl, une vore preseât dai lôr coetanis (si contin passe 9.500 iscrits e plui di 20.000 oris di visualizazion), a contin lis lôr passions, cun contignûts e curiositâts sul Friûl.
Tal video, i 8 youtubers furlans a àn volût metisi in zûc suntun teme impuartant: trasmeti ai lôr coetanis la impuartance di salvâ une vite graciis ae donazion di medole dai vues. Come simpri, il lôr stîl al è lizêr, ma il teme al è dal dut seri e i fantats lu frontin cun sensibilitât: pe Admo al è fondamentâl rivâ ai fantats e aes fantatis fra i 18 e i 35 agns, in buine salût e cuntun pês sore dai 50kg. La sielte di fâlu in colaborazion cu la ARLeF e la clape di YoupalTubo e je peade ae pussibilitât di vierzi un altri canâl di dialic cui zovins che e partissi propit di lôr .
I fantats di YoupalTubo a àn realizât une clip che e rivarà al cûr dai lôr coetanis, fasintjur capî che nol è nuie ce vê pôre ma che, al contrari, notâsi tal regjistri dai donadôrs al rapresente un at di gjenerositât e une grande pussibilitât, ven a stâi chê di salvâ une vite.
Consulte i materiâi
| Ogjet | Cjale |
| Visite il sît par furlan de ASU FC |
|
| Cjale il video di Youpaltubo |
|
