In chescj dîs e je partide une iniziative gnove indreçade ai frutins tra i 3 e i 10 agns, pensade propit par judâju a imparâ il furlan in maniere legre e divertente.
I Bombons furlans, di fat, a son vincj videos curts realizâts cu lis protagonistis de trasmission pe infanzie Maman! par spiegâ ai plui piçui argoments di gramatiche e lenghe furlane in maniere semplice. Un percors che al partìs dal alfabet furlan, cui caratars speciâi de nestre lenghe, al passe pai nons dai mês e des stagjons, par rivâ ai verps, ai adietîfs e ai pronons. Une piçule scuele par furlan, cence movisi di cjase.
Al è pussibil viodi i Bombons sedi sul canâl YouTube de Agjenzie, sedi te sezion di pueste dal nestri sît “Imparâ il furlan zuiant“.
Cun di plui, in gracie de colaborazion cun Telefriuli, i videos a son trasmetûts ancje dentri di “Ricreazione“, une trasmission pensade pai fruts e lis lôr fameis, realizade in colaborazion cui insegnants, che e va in onde ogni buinore aes 9:30 sui canâi 11 e 511HD dal digjitâl terestri.
