Inte suaze de “Festa della Mela”, apontament ARLeF pai plui piçui
Ai 17 di Setembar, un dopomisdì di zûcs par furlan
Inte suaze de “Festa della Mela” di Tumieç al torne “Cjantâ e zuiâ cun Maman!”, un apontament une vore spietât cun Daria Miani e il mont colorât di Maman!, il program tv in lenghe furlane che ur plâs une vore ai fruts.
Sabide ai 17 di Setembar, a tacâ des 15.30, sot dal tendon di place XX di Setembar, si podarà cjantâ, zuiâ cu la “Ruede de Fortune” e divertîsi cul laboratori di piture. Ae fin, ducj i partecipants a varan i gadgets de trasmission, che la sô setime stagjon e tacarà ai 7 di Otubar, plene di novitâts, piçui amîs e une gnove rubriche par zuiâ cul furlan e cul inglês!
Maman! e je une trasmission televisive pe infanzie in lenghe furlane, risultât di une coproduzion de ARLeF e di Telefriuli (canâl 11 dal digjitâl terestri). Un contignidôr che i piçui telespetatôrs a amin tant, siôr di rubrichis, cartons animâts, leturis, musiche e zûcs, cu la conduzion di Daria Miani e che si indrece ai fruts de scuele materne e primarie. Un format che ur da mût ai fruts di imparâ, divertîsi e cressi cu la lenghe furlane e che al permet aes fameis di podê contâ suntun program che al stice la creativitât e la curiositât midiant di un metodi ludic e educatîf plurilengâl.
Propit chest format, fat di zûc e didatiche, al sarà proponût ae “Festa della Mela” a Tumieç, par un dopomisdì plen di divertiment, par furlan!
