Il social manager pal compart culturâl e creatîf
La ARLeF, intune cun diviersis altris realtâts, e je partner dal progjet che al nas par garantî une specializazion adeguade intal setôr dal marketing digjitâl. Fin ai 22 di Zenâr dal 2020, di fat, al sarà pussibil notâsi al cors gratuit (finanziât dal Fonts sociâl european) di 240 oris, in partence dai 27 di Zenâr li dal IRES di Udin.
Il cors si indrece aes personis disocupadis cun formazion e esperience professionâl tal ambit artistic, te tutele e te valorizazion dai bens culturâi e/o intal setôr creatîf de comunicazion. Il profîl al inten la figure dal Social Media Strategist e dal Content Manager cun riferiment specific al compart culturâl e creatîf.
Une atenzion particolâr e vignarà dade a cualchi specificitât dal setôr culturâl e creatîf tant che, par esempli, lis particolaritâts dal marketing culturâl a pet di chel tradizionâl, i struments pe racuelte fonts e/o pal finanziament dai progjets culturâi, lis gnovis tecnologjiis digjitâls pe condivision e la fruizion culturâl (in particolâr musicâl), la normative di riferiment pal operadôr culturâl (par esempli acessibilitât) e pal social manager (gjestion e tratament dai dâts e GDPR).
Cun di plui, ogni arlêf al podarà disvilupâ intal ambit dal Progjet di lavôr un plan strategjic specific di web marketing di meti in vore intun tirocini di podê fâ, a conclusion dal percors formatîf, li di un dai partners dal progjet.
Sul sît dal IRES si pues cognossi intal detai ducj i recuisîts necessaris par iscrivisi al cors e discjamâ la domande di partecipazion.
