Cui che al sa il furlan, al sa di plui. Catine e je la testimonial de gnove campagne di promozion de ARLeF par fâ cressi la cussience che la lenghe furlane e je une risorse impuartante pe educazion linguistiche.
La narazion dal spot video Cudumars, che al sarà trasmetût su tv, web e social, si fonde in particolâr suntun messaç: fâ cressi la cussience che fevelâ par furlan in cjase e je une risorse. Mari e pari a taule a fevelin par furlan tra di lôr, ma cui fîs a passin simpri al talian, ancje par cirî di convinci il piçul Fabio a mangjâ i cudumars che al à tal plat. Al è chi che e jentre in sene une Catine in miniature… e mari e pari no i pensaran plui sù dôs voltis tal indreçâsi par furlan ancje ai fîs.
La vôs e la simpatie di Catine a marchin la impuartance di fevelâ par furlan te relazion tra gjenitôrs e fîs e tra nonos e nevôts ancje tal spot radiofonic, adun cun Fabiano Fantini.
La campagne Cui che al sa il furlan, al sa di plui e cjape dentri spots pe television e pe radio, pagjinis de stampe su cjarte e comunicazion web e social.
Par savênt di plui, visite la pagjine di progjet Cui che al sa il furlan, al sa di plui
