La colaborazion tra ARLeF, Regjon F-VJ, Insiel e Meta par insaldâ il sens di identitât dai furlans midiant dal social network plui doprât
Di vuê ancje Facebook al fevele par furlan: di fat si lu pues sielzi tant che lenghe de interface dal social plui innomenât.
In bande dal potenziament de presince de lenghe furlane sui social networks, il “Plan gjenerâl di politiche linguistiche pe lenghe furlane 2021-2025” al previôt ancje la difusion dal furlan te esperience di ûs des plateformis tecnologjichis principâls. Propit in cheste suaze si inserìs il progjet nassût de colaborazion fra la Regjon Autonome Friûl-Vignesie Julie, la ARLeF, INSIEL e il colòs Meta Platforms di Mark Zuckerberg.
Al sarà duncje a disposizion di ducj un altri strument che al permet di favorî l’ûs de lenghe furlane te cuotidianitât. La pussibilitât di doprâ la interface di Facebook par furlan e darà ancje un contribût par insaldâ il sens di identitât e di comunitât dai furlans sul teritori e intal mont.
Cun doi miliarts di utents atîfs ogni dì a nivel globâl, Facebook al è il social network plui grant e plui doprât dal mont. Al è un mieç une vore util a pro de difusion de lenghe, e bon di tocjâ un public larc, sedi par etât che par interès.
Meta si è dimostrât sensibil cu lis comunitâts che a fevelin lenghis mancul pandudis, e ae propueste di progjet rivade dal Friûl, al à rispuindût cun grant entusiasim, dant daurman la disponibilitât a lavorâ adun cui partners regjonâi. Il progjet si à inviât cuntune azion di Insiel, la societât ICT in house de Regjon Friûl-Vignesie Julie, che e à permetût di voltâ un prin bloc di stringhis par furlan, par po dopo lâ indenant inte ativitât plui slargjade che e à viodût la ARLeF tant che part ative par definî il progjet finâl, sigurant une traduzion di cualitât alte e coerente cu la terminologjie dal social network. Cussì, vuê la traduzion par furlan e rapresente un câs di ecelence a nivel globâl pe promozion des lenghis minoritariis intes tecnologjiis.
Pal moment, la version furlane si podarà selezionâ dome inte version web di Facebook, invezit pe app si varà di spietâ, par vie che lis lenghis di podê selezionâ, in chest câs, a son une vore pocjis. E je une ativitât che e larà indenant intal avignî, in graciis di un lavôr sinergjic, necessari par restâ simpri inzornâts cuntun strument dinamic e in evoluzion continue, tant che Facebook, cundut che, e no si pues evitâ, ducj i inzornaments no si podaran fâ in “timp reâl”.
