Tai 946 agns de costituzion dal Stât patriarcjâl furlan, fondât ai 3 di Avrîl dal 1077, a son in vore i preparatîfs pe edizion numar 46 de Fieste de Patrie dal Friûl.
Lis celebrazions uficiâls a son in program par domenie ai 16 di Avrîl a Caprive, Comun dal Friûl Orientâl insuazât tal Cuei e che si poie su lis rivis dal torint Versa.
La ricorince, ricognossude in maniere uficiâl de Regjon Autonome Friûl-Vignesie Julie dal 2015, e gjolt de poie de Regjon stesse e de ARLeF e de colaborazion dal Istitût Ladin Furlan “Pre Checo Placerean”, e si figure tant che la ocasion par celebrâ in comunitât i valôrs culturâi, linguistics e identitaris dal popul furlan.
Cjapant il testemoni dal Comun di Vît, dulà che si veve celebrade la Fieste tal 2022, a Caprive la zornade si davuelzarà cun chest program:
si tache aes 09.30 cu la esposizion de bandiere dal Friûl li dal monument dai muarts in vuere (vie Dante Alighieri), intant che la bande “Città di Cormons” e sunarà l’Imni uficiâl dal Friûl “Incuintri al doman“.
Aes 9.45 il corteu si movarà bande la glesie parochiâl di Caprive, dulà che aes 10.00, e sarà celebrade la Sante Messe par furlan, cun leturis e preieris ancje par todesc e sloven. La liturgjie e sarà acompagnade dai cjants dal côr “Polifonico Caprivese” e, sedi prime che dopo de messe, si podarà sintî a sunâ i “Scampanotadôrs dal Gurizan”.
Lis celebrazions si spostin li dal centri civic, intant che di Aquilee e rive la delegazion di cicloturiscj de FIAB regjonâl.
Aes 11.15 si esibiran i grups folcloristics di Caprive “Michele Grion” e “Primavera”, prin di tacâ cu la cerimonie civîl de Fieste de Patrie, che si vierzarà cul Imni uficiâl dal Friûl, cjantât dal “Polifonico Caprivese”.
Si larà indenant cu la leture de bole imperiâl di bande dal grup storic “Città di Palmanova”, il scambi de bandiere dal Friûl (che chest an e sarà la riproduzion fedêl dal drap origjinâl dal secul XIV) e i salûts des autoritâts.
Dopo il gustâ a Villa Russiz, e je la pussibilitât di fâ dôs visitis vuidadis ae Fondazion Villa Russiz (pes 15.00) e al Cjistiel di Spesse (pes 16.30).
Pal gustâ e pes visitis, prenotazion obligatorie dentri dai 11 di Avrîl dal 2023 contatant i riferiments dal Sportel Furlan: info@sportelfurlan.eu o 0432 1743400.
Des 10.00 indenant, speciâl Fieste de Patrie su Telefriuli, canâl 11: di Caprive, direte de Messe e de trasmission “Il campanile della domenica”.
Consulte i materiâi
| Ogjet | Cjale |
| Discjame la locandine cul program |
|
