Si invie cu la innomenade naine furlane “Ursule parussule” il gnûf carton animât de ARLeF – Agjenzie Regjonâl pe Lenghe Furlane che al insegne ai fruts regulis impuartantis di igjiene, simpri plui fondamentâls in dì di vuê.
Protagoniscj a son Free e Ulli: un grant crot e une piçule moscje, personaçs che i fruts a àn imparât a volêur ben cu la trasmission televisive “Maman!”. Te storie “Free&Ulli e lis besteatis”, chescj doi personaçs simpatics si lavin ben lis mans: ai fruts ur bastarà imitâju par fâlu te maniere juste e pal timp che al covente. Cui lôr esemplis, imparâ altris abitudins sanis al sarà un zûc pardabon divertent.
Il progjet al è nassût de colaborazion cu la Protezion civîl regjonâl, sul imprin tant che schede a fumets, e al devente cumò un strument ancjemò plui valit par stâ dongje ai gjenitôrs, ai nonos e ai insegnants tal percors fondamentâl di educazion ae salût dai frutins.
Free e Ulli a nassin de ilustradore Patrizia Geremia e a dan vite aes storiis de golaine di libris editade di Futura Edizioni, che la ARLeF i à afidât ancje la creativitât di cheste serie “speciâl”. Lis vôs prestadis ai personaçs a son chês di doi atôrs furlans cognossûts, Claudio Moretti e Elvio Scruzzi, intant che la vôs che e conte e je chê di Daria Miani, condutore de famose trasmission Maman! dulà che Free e Ulli a son di cjase.
Cjale il video complet dal carton animât e discjame la schede a fumuts ca sot.
Consulte i materiâi
| Ogjet | Cjale |
| Free & Ulli e lis besteatis - carton animât |
|
| Free & Ulli e lis besteatis - schede |
|
| Free & Ulli e lis besteatis - carton animât di discjamâ |
|
