“Giorgio Mainerio, un misteri furlan. Vita e eresie di un friulano geniale” al è il titul dal spetacul, produsût di ARLeF e Mittelfest, che al sierarà la edizion 2020 dal Festival di musiche, bal, teatri e arts visivis dai paîs de Mittelurope – Mittelfest, domenie ai 13 di Setembar alì dal Teatri A. Ristori di Cividât.
Une opare che e je une dediche di amôr al Friûl, ancje intai siei aspiets mancul cognossûts, lant daûr dai riui platâts de sô culture sverzelade. Intun di chescj e cor la storie di Giorgio Mainerio (Parma, 1535-Aquilee, 1582): musicant, predi e, forsit, necromant. Lu presente cussì Marco Maria Tosolini, autôr de dramaturgjie e regjist de opare adun cun Paolo Antonio Simioni: “La sô figure e je emblematiche de complessitât pôc cognossude e visionarie dal ‘500 furlan, dulà che il cult e il popolâr si messedin intun misteri no simpri sondabil, dant ae storie di cheste tiere elements di incjant vêr”. Mainerio al fo innomenât a nivel european pal so Primo libro de’ balli, editât a Vignesie intal 1578 di Gardano, là che si cjate ancje la famose Schiaraçule Maraçule.
“Giorgio Mainerio, un misteri furlan” al sarà une vivificazion ex novo dai fats che a puartarin Mainerio a jessi incuisît par eresie (e po dopo assolt) intal 1563, cuntun lengaç artistic atuâl là che dôs polaritâts musicâls – di une bande la musiche antighe e di chê altre la tastiere eletroacustiche -, cuatri atôrs e une figurante i daran vite a une sene une vore mobil, insiorade di landscapes sonôrs eletronics trasfigurants e videomappings visionaris che a pontaran il lôr fûc su la opare di pitôrs tant che, par nomenâ cualchidun, Tonino Cragnolini, che i dedicà a Mainerio un cicli di oparis, Hyeronimus Bosch, Pieter Bruegel “Il vecjo”, Arcimboldo, Cranach, ma ancje autôrs une vore preseâts dal Friûl dal Cinccent.
Il spetacul – che al puartarà cun se ancje elements dal contest plurilinguistic e pluriculturâl dal nestri teritori – si manifestarà intune sorte di opare videoteatrâl realizade in plui localitâts furlanis che dome su la fin e cjaparà “cuarp” sul palc. L’audio in esafonie al judarà a creâ efiets sensoriâi une vore particolârs. Il public al sarà part ative de pièce, ma, stant che si trate di un Misteri, no si puedin disvelà daurman dutis lis sorpresis.
Par permeti a ducj di assisti a cheste prime assolude, la direzion di Mittelfest e à decidût di organizâ dôs rapresentazions dividudis: la prime aes 18:30 e la seconde aes 21:30 di domenie ai 13 di Setembar.
Giorgio Mainerio, un misteri furlan – Giorgio Mainerio, un mistero friulano (Italie)
ideazion e direzion artistiche Marco Maria Tosolini
dramaturgjie e regjie Marco Maria Tosolini e Paolo Antonio Simioni
cun Paolo Antonio Simioni (Giorgio Mainerio), Massimiliano Sassi (Fra Felice da Montefalco), e cun Gianna Barbacetto (Puta Nera), Nauli Pauli (Benandant Orso Zanutto), Martina Buttazzoni (Agana), Paola Bacchetti (vôs de fantasime)
cu la partecipazion straordenarie di Gabriele De Cecco (il frut sparît)
musichis antighis Fabio Accurso
musichis eletroacustichis improvisadis Angelo Comisso
coordenament de produzion e consulence musicâl Giulia D’Andrea
ricercjis iconografichis, videocreazions e sound landscapes Federico Màzzolo
colaborazion pe produzion audiovideoeletriche Sacha Safretti
cure sartoriâl Elisa Segnaboni
consulence straordenarie di Mestri di armis Roberto Battilana
ripresis e montaç Entract
editing audio e experimental sound Vittorio Vella
consulence linguistiche pe lenghe furlane William Cisilino e Michele Calligaris
produzion Mittelfest 2020 e ARLeF Agjenzie Regjonâl pe Lenghe Furlane
in colaborazion cun
Teatri Stabil Furlan
Fondazione Lirica Teatro “G. Verdi” di Triest
Fondazione Friuli
Associazione Musicologi
Dipartimento Nuovi Linguaggi dal Conservatori “G. Tartini” di Triest
Comun di Udin – Assessorât ae Culture
Complès bandistic “I Cjastinârs” di Muris di Ruvigne direzût di Elisa Frezzani
Compagnie Teatrâl di Ruvigne
Grup Storic “Città di Palmanova”
Parochie di Sante Crôs di Muris
cul patrocini dal Comun di Ruvigne
Consulte i materiâi
| Ogjet | Cjale |
| Giorgio Mainerio_librut dal spetacul |
|
