Organizâts de ARLeF e de Societât Filologjiche Furlane, a tacaran ai 8 di Fevrâr
I cors pratics di lenghe e culture furlanis, sostignûts de ARLeF e inmaneâts de Societât Filologjiche Furlane, chest an si fasaran intune gnove version online, par garantî la continuitât al insegnament de marilenghe ancje in timps di pandemie.
Lis lezions di alfabetizazion a tacaran ai 8 di Fevrâr dal 2021 e si fasaran online, su lis plateformis Moodle e Zoom. A son in program 10 lezions asincronis su plateforme Moodle e trê incuintris sincrons su Zoom, ognidun di une ore cirche (in oraris che a vignaran comunicâts ai corsiscj). Ogni setemane al sarà publicât su Moodle materiâl formatîf gnûf che al sarà simpri a disposizion, di mût che i partecipants a puedin davuelzi lis ativitât sprontadis dal cors in totâl autonomie e intai oraris desiderâts.
La gnove oportunitât formative e dopre tant che fonde i contignûts dal prin volum de golaine Lenghe e culture dedicât ae formazion dai adults. Si pues viodi e discjamâ il volum achì.
I cors a son destinâts a no plui di 90 partecipants. Pes iscrizions, clamâ al numar 0432 501598 o scrivi a formazione@filologicafriulana.it
