La edizion 2023 dal Calendari Storic dai Carabinîrs e “fevele”, pe prime volte, in lenghe furlane: e je la enesime testemoneance dal leam profont de Arme cul teritori furlan. La iniziative, nassude de colaborazion tra il Comant de Legjon dai Carabinîrs “Friuli Venezia Giulia”, la Regjon Autonome Friûl-Vignesie Julie e la Agjenzie regjonâl pe lenghe furlane, e je stade presentade te sede de legjon, a Udin, denant dal Gjenerâl Francesco Atzeni, comandant de Legjon dai Carabinîrs dal Friûl-Vignesie Julie; Pierpaolo Roberti, Assessôr regjonâl aes autonomiis locâls; Piero Mauro Zanin, president dal Consei Regjonâl dal Friûl-Vignesie Julie; Pietro Fontanini, sindic dal Comun di Udin; la senatore Francesca Tubetti; Fabrizio Tomada, conseîr dal Fogolâr Furlan di Rome; e Eros Cisilino, president de Agjenzie regjonâl pe lenghe furlane. Pe ocasion a jerin presintis cetantis autoritâts.
La marilenghe e je une des 10 lenghis che al è stât voltât il Calendari dal 2023, dongje dal inglês, dal francês, dal spagnûl, dal todesc, dal portughês, dal gjaponês, dal cinês, dal arap e dal sart. E je une ocasion che e rint pardabon onôr al furlan, lenghe ricognossude in maniere uficiâl dal Stât talian cu la leç 482/99.
Il Calendari al è une publicazion un grum cirude, colezionade in Italie e tal forest, che di cuasi 100 agns e rapresente un apontament impuartant intal panorame editoriâl talian. Come simpri, la publicazion e vûl jessi il spieli dal Paîs tal so lâ indenant te storie. In particolâr, il teme sielzût par cheste edizion al è chel de tutele ambientâl, de biodiversitât e dai ecosistemis, che al à cjatât puest tal test dal gnûf articul 9 de nestre Costituzion, zontant cussì la vie de sostignibilitât tra i principis fondamentâi che a àn di regolâ la nestre convivence tal interès des gjenerazions futuris.
L’obietîf dal progjet al è chel di contâ i temis leâts al lavôr cuotidian de Arme, cuntun stamp di pulizie formâl e di sintesi visive che al marche la sô componente istituzionâl. A nassin cussì lis dodis tapis di un percors che al pant la azion impuartante dai Carabinîrs te difese dal ambient e dal teritori dal Paîs, te protezion dal nestri patrimoni faunistic e vegjetâl, e te tutele di une civiltât agroalimentâr che il mont nus invidie.
