Protagoniscj i zovins, tra Friûl, New York, Parîs, Los Angeles
Par celebrâ la Fieste de Patrie dal Friûl, ai 3 di Avrîl, la ARLeF – Agjenzie Regjonâl pe Lenghe Furlane chest an e à decidût di regalâ a ducj i furlans un gnûf video che al mostre la vite di ogni dì, soredut di zovins furlans che si cjatin a vivi lontan de lôr tiere di divignince, ma che dut câs a restin simpri leâts a jê in maniere fuarte.
Un filmât che, in mancul di doi minûts, al compagne i spetatôrs intun zîr dal mont: di Udin a New York, Parîs e Los Angeles, par tornâ ae fin di gnûf in Friûl, cui siei paisaçs maraveôs, e che al è in stât di fâ viodi ben la impuartance des lidrîs, de storie e des relazions familiârs. Ducj leams rapresentâts in maniere autentiche propit de bandiere de Patrie.
La Bandiere dal Friûl – la setime plui antighe in Europe (secul XIV), e ricognossude in maniere uficiâl cu la leç regjonâl 27 dal 2001, che si pues amirâ inmò vuê intal Museu dal Domo di Udin – e je duncje il fîl ros che al lee ogni puest di chest viaç.
Ancje chest an si fasarà fieste in modalitât virtuâl. La manifestazion principâl de Fieste, programade intun prin moment ai 11 di Avrîl a Udin, e je stade rimandade. Une decision grivie ma che no si podeve evitâ, cjapade in cunvigne fra la ARLeF e il Comun di Udin.
Cun chest video la ARLeF e vûl jessi dongje a ducj i furlans, in Friûl e tal mont, invidantju a meti fûr lis bandieris inte zornade dai 3 di Avrîl. No a câs, la frase che e siere il filmât e dîs: «In ogni bande dal mont, la nestre acuile nus ten simpri dongje».
Discjame achì sot l’aprofondiment su la Bandiere dal Friûl.
Consulte i materiâi
| Ogjet | Cjale |
| La bandiere dal Friûl |
|
