Dilunc de emergjence sanitarie di Covid-19, la ARLeF si è metude adun cu la Protezion Civîl e la Direzion Central Salût de Regjon F-VG par difondi informazions e racomandazions in lenghe furlane par protezisi dal Coronavirus.
La prime azion specifiche e je dedicade ae sanificazion des mascarutis protetivis, cu la realizazion par furlan dal videotutorial fat dal Grup Comunâl Volontaris di Protezion Civîl dal Comun di Udin. Il video al spieghe cemût lavâ in maniere corete e sigure – par podê jessi dopradis plui voltis – lis mascarutis di stofe che par tant timp a protezaran la nestre cuotidianitât, pe strade, intes buteghis e sul puest di vore.
La seconde iniziative, nassude simpri de colaborazion tra Agjenzie Regjonâl pe Lenghe Furlane, Protezion Civîl e Direzion Central Salût de Regjon F-VG par dâ informazions e racomandazions in lenghe furlane par protezisi dal Coronavirus, e rivuarde un sfuei informatîf sul Coronavirus che al spieghe cemût limitâ la infezion.
Stampât in 10.000 copiis de Regjon, al è in distribuzion – e a disposizion di ducj i utents – tai presidis e tes struturis ospedalieris des aziendis sanitariis dal teritori furlanofon.
