La 45e edizion de Fieste de Patrie dal Friûl e je stade celebrade ai 3 di Avrîl dal 2022 tal Friûl di soreli a mont, in comun di Vît: un teritori cenglât di bielece, fra boscs incontaminâts e aghis limpiis, espression di trop che il Friûl al sedi ancjemò une tiere dute di esplorâ.
Inmaneade dal Comun di Vît, cu la poie de Regjon Autonome Friûl – Vignesie Julie e de ARLeF, in colaborazion cul Istitût Ladin Furlan “Pre Checo Placerean”, la manifestazion e je stade ancje la ocasion par un anunzi impuartant: dopo di San Michêl dal Tiliment, Tei e Cint, ancje altris trê Comuns dal Venit – Puart, Gruâr e Fossalte – a àn fat domande par jentrâ in maniere uficiâl fra i Comuns dal ambit furlanofon.
La zornade e je tacade cu la esposizion de bandiere dal Friûl sul monument ai Muarts in vuere di Vît, un moment di solenitât compagnât dal côr di Fors Davôtri. Po dopo, te glesie parochiâl di Vît e je stade dite Messe in lenghe furlane, cun leturis e preieris ancje par sloven e par todesc; infin al è stât il moment pe esibizion de orchestre di zovins Sante
Margarite di Anduins.
A misdì, tal centri polifunzionâl di Cjasiât, là che si son cjatâts i cicloturiscj de FIAB regjonâl partîts di Codroip, e je duncje scomençade la cerimonie civîl, vierte cu la leture de bole dal imperadôr Indrì IV. Po dopo, Pietro Fontanini – tant che sindic dal Comun di Udin, che l’an passât al à ospitât la Fieste – al à consegnade la bandiere dal Friûl al prin citadin di Vît, Pietro Gerometta, che cul so intervent al à ringraciât ducj i presints e lis autoritâts, cence platâ la sodisfazion di podê dâi acet ae manifestazion.
Finide la cerimonie civîl, lis autoritâts intervignudis a àn podût assisti in anteprime ae proiezion de gnove version, in clâf moderne, dal Imni dal Friûl “Incuintri al doman”.
Il program, par cure dal Eco Museu Lis Aganis, al è lât indenant ancje tal dopomisdì, dopo dal gustâ tradizionâl, ufrint ai presints la pussibilitât di visitâ tancj puescj simbolics dal teritori.
Date de Iniziative: Avrîl 2022Imagjins
