Gurize e je stade sielte tant che sede de Fieste de Patrie dal Friûl 2019, 942 agns dopo de nassite dal Stât patriarcjâl furlan.
L’event si è davuelt domenie ai 7 di Avrîl: i partecipants si son cjatâts in Plaza Granda (Place Vittoria), aes 9.45, par assisti ae esposizion de bandiere dal Friûl. L’acompagnament musicâl al jere dal Grup bandistic “Tita Michelàs” di Flumisel, direzût dal mestri Giorgio Cannistrà. Dopo, la bande e à acompagnât il corteu fin te Glesie di San Roc, dulà che i delegâts des trê diocesis di Gurize, di Udin e di Pordenon a àn celebrât la messe par furlan cun leturis e preieris ancje par sloven e par todesc. La celebrazion e je stade acompagnade de Corâl parochiâl “Santa Lucia”, direzude di Giada Piani.
Po dopo e je stade fate la cerimonie civîl, li de sale “Incontro” de parochie di Borc San Roc (daûr de glesie). L’event al è scomençât cul imni uficiâl dal Friûl “Incuintri al doman”, sunât dal cuintet feminin ArteVoce Ensemble; subit daûr al è stât il scambi de bandiere dal Friûl, consegnade al sindic di Gurize di un rapresentant dal comun di Voleson Darzin, che al veve ospitade la Fieste intal 2018. E je stade dade po dopo leture de bole dal imperadôr Indrì IV, che e rapresente l’at di fondazion de Patrie dal Friûl, e daûr al vignarà il salût des autoritâts.
La cerimonie e je stade ancje la ocasion par premiâ lis scuelis de infanzie, primariis e secondariis di prin grât che a àn vint il concors a premis “Emozions furlanis in viaç pal teritori”, promovût dal Ufici Scolastic Regjonâl adun cu la ARLeF, che al è rivât ae otave edizion. L’event si è sierât cui tedofars de Stafete pal Friûl, partide te buinore di Marian, che a son rivâts in sale par consegnâ in maniere simboliche al sindic di Gurize la bole imperiâl che lis scuadris partecipantis – un centenâr di coridôrs – si son scambiadis tant che testemoni.
Dut l’event alè stât trasmetût in direte te trasmission “Il Campanile della Domenica”, in onde su Telefriuli.
Il ristorant “Ai tre soldi goriziani”, al à proponût un menù tipic convenzionât pai partecipants ae Fieste.
Cun di plui, intal dopomisdì, visitis vuidadis gratuitis ae sinagoghe e al Ghet ebraic.
Come ogni an, lis celebrazions de Fieste dal Friûl a jerin inricjidis di un calendari impuartant di events promovûts dai comuns che a àn aderît al bant promovût de ARLeF, in atuazion de Leç n. 6/2015 pe poie aes manifestazions culturâls che a acompagnin la ricorence: chi il program detaiât dai events organizâts in dut il Friûl.
Date de Iniziative: Març 2019Imagjins
