E je stade pardabon une fieste grande – cun tante partecipazion di public e di autoritâts – chê lade in sene a Caprive domenie ai 16 di Avrîl in ocasion de “Fieste de Patrie dal Friûl”. Tes celebrazions de 46te edizion e je stade protagoniste la bandiere dal Friûl: cun di fat, l’Istitût Ladin Furlan “Pre Checo Placerean” e la ARLeF – Agjenzie regjonâl pe lenghe furlane a àn dât al artist marcjesan Francesco Pellegrini la incarghe di fâ une riproduzion fedêl de bandiere storiche. La copie e je stade presentade in maniere uficiâl dilunc de cerimonie civîl. Di cheste edizion indenant, e sarà il “testemoni” che i sindics che a ospitin la Fieste si scambiaran di un an a di chel altri.
La manifestazion – organizade dal Comun dal Friûl orientâl cu la poie de Regjon Autonome Friûl-Vignesie Julie e de ARLeF, in colaborazion cul Istitût Ladin Furlan “Pre Checo Placerean” – e je tacade cu la esposizion de bandiere dal Friûl, acompagnade de bande “Città di Cormons”. La Messe par furlan, cun leturis e preieris ancje par sloven e todesc, e je stade acompagnade dai cjants dal “Polifonico Caprivese” e, finide la funzion, i “Scampanotadôrs dal gurizan” a àn sunât di fieste.
Lis celebrazions a son ladis indenant tal Centri civic di Caprive cu la cerimonie civîl: prime cu lis danzis dai grups folcloristics “Michele Grion” e “Primavera”, e po dopo cuntune delegazion di cicloturiscj de FIAB regjonâl rivade di Aquilee, di indulà che – in maniere simboliche – e jere partide te buinore. La cerimonie civîl si è fate daûr dal program tradizionâl de Fieste: la leture de bole imperiâl, chest an par cure dal grup storic “Città di Palmanova”, il scambi de bandiere tra Giuseppina Gerometta, conseire dal Comun di Vît che al à ospitade la Fieste tal 2022 e il sindic di Caprive Daniele Sergon, e i salûts des autoritâts. La zornade e je stade insiorade ancje dal intervent di Francesco Pellegrini che al à spiegât al public chel che al è stât il studi, e po dopo il lavôr, par realizâ la riproduzion de bandiere dal Beât Bertrant, une tra lis plui antighis di Europe, conservade tal Museu dal Domo di Udin. Dilunc de cerimonie, cun di plui, al è stât consegnât un ricognossiment a Lucia Follador, diretore dal côr di zovins “VocinVolo – Ritmea” di Udin, che al à interpretât, adun cul pianist Alessio Domini, l’Imni uficiâl dal Friûl intal gnûf video difondût sul web in ocasion dai 3 di Avrîl stâts, e zirât a Vile Gallici Deciani.
Tancj i sindics e i rapresentants dai comuns furlanofons che a àn partecipât ae zornade di fieste. Insiemi cul paron di cjase, il sindic di Caprive Daniele Sergon, a puartâ il salût dilunc de cerimonie civîl a son stâts Paolo Paron, cu la funzion di President de ARLeF; Geremia Gomboso, president dal Istitût Ladin Furlan; Ornella Comuzzo, in rapresentance de ACLIF, Assemblee di comunitât linguistiche; Dorino Favot, President de ANCI F-VJ Associazione Nazionale Comuni Italiani; Walter Bandelj, President di SSO Svet slovenskih organizacij e Alfredo Sandrini, President di KKV Kanaltaler Kulturverein. In particolâr, la presince dai rapresentants di chês altris minorancis linguistichis e à rimarcât cemût che la Fieste che e celebre il Friûl e la sô lenghe e sedi ancje un moment impuartant par ricuardâ il valôr e la ricjece dal plurilinguisim de nestre regjon.
Presints ancje Diego Bernardis, Antonio Calligaris, Elia Miani, Massimo Moretuzzo, Barbara Zilli. Fra i intervents ancje la senatore Francesca Tubetti, che e à puartât un salût, e la eurodeputade Elena Lizzi.
Il program de Fieste al è lât indevant tal dopomisdì, dopo dal gustâ tradizionâl, cu la pussibilitât pai presints di visitâ Vile Russiz e il Cjistiel di Spesse.
Date de Iniziative: Avrîl 2023Imagjins
