Par celebrâ la Zornade internazionâl de Lenghe Mari, intal 2018, e je stade organizade de ARLeF, a Udin, une serade dedicade ae lenghe furlane e ae ricjece des sôs varietâts, cul conciert di Franco Giordani.
Il cjantautôr furlan al à presentât il so ultin lavôr Truòisparìs: un cd musicâl chel al è ancje un progjet coragjôs e impegnatîf. Il public al ven compagnât traviers un reticul di “trois sparîts” (al è propit chest, di fat, il significât dal titul) intal cûr dal Cjanâl de Ciline, tra Andreis, Claut, Barcis, Nert e Cjas e Cimolais, doprant lis varietâts linguistichis locâls.
Giordani al à metût in musiche i tescj di Federico Tavan, Giuseppe Malattia, Mauro Corona e Andrea Nicoli, cirint di contâ il cuotidian di personaçs tant che Bepi Manarin, ma ancje i acjadiments tragjics tant che chel dal Vaiont.
Tra lis cjançons, ancje une dediche a Revelli, un regâl splendit a Ruggero Grava, zuiadôr dal Turin: une vicende plene di emozions, une storie di emigrazion e di riscat, che si è concludude in maniere tragjiche intal moment plui alt, ai 4 di Mai dal ’49, cu la tragjedie di Superga. Lu àn compagnât i musiciscj Massimo Gatti al mandulin, Icaro Gatti al liron e Elvis Fior ae batarie.
La protagoniste de serade e je stade la lenghe furlane cu lis sôs variantis e lis lôr cetantis carateristichis, cul obietîf di ufrî une schirie di ispirazions e di riflessions su la ricjece de marilenghe.
Cemût convivino varietât locâl e lenghe standard? In ce mût une e inricjìs chê altre? Ce si intindial cun cressi cun plui lenghis?
Tra lis riflessions presentadis prime dal conciert, dopo chês di Federica Angeli, cjargnele doc che e lavore tant che operadore linguistiche professionâl monvintsi cence problemis tra cjargnel e koinè, e je rivade sul palc la testemoneance preziose dal poete e scritôr Maurizio Mattiuzza. Chest ultin, doprant cun abilitât compagne il furlan in bande dal talian e dal dialet de Valsugana, che i è rivât de mari, al è deventât une des personalitâts plui significativis de leterature furlane contemporanie, jessint ancje il vincidôr di premis di poesie impuartants, tant che l’InediTo – Premio Colline di Torino, tal 2014, e Alda Merini tal 2017.
Consulte i materiâi
| Ogjet | Cjale |
| Invît Truòisparìs 2018 |
|
