Pe edizion 2016 de Fieste de Patrie, la ARLeF e à domandât al rapper furlan Dj Tubet di creâ une cjançon par spiegâ la storie dal Friûl ai zovins. La creazion artistiche di Dj Tubet e je “No sta a contâmi dome chê storie”, fate insiemi cu la cjantante Camilla Gras, in art Milly, che pe prime volte e cjante par furlan. La cjançon e à tant che suaze la storie di un soldât in trincee dilunc de prime vuere mondiâl che, inte spiete dal gnûf ordin di atac, al torne a vivi lis tapis plui impuartantis de storie dal Friûl fasint cussì une piçule riflession su vuere, pâs e propriis lidrîs. I moments storics ricuardâts a son gjavâts fûr dal libri “La nestre storie” di pre Checo Placerean. Inte composizion de base rap, e je une citazion melodiche dal Cinccent di Giorgio Mainerio: “Putta nera, ballo furlano”.
Pe realizazion dal video, imagjin promozionâl uficiâl de Fieste de Patrie, edizion 2016, al è stât istituît un concors viert ai regjiscj. Il vincidôr dal concors di ideis inmaneât de ARLeF pe realizazion dal video de cjançon al è Massimo Racozzi di Monfalcon. Il video, realizât di Racozzi in colaborazion cun Stefania Carlotta Del Bianco e Maurizio Mattiuzza, al rapresente l’acompagnament visîf des peraulis de cjançon, cuntune storie ideade e realizade doprant la tecniche dal dissen animât fat a man.
La ARLeF e à decidût di sostignî e di doprâ chest progjet, oltri che come veicul multimediâl promozionâl de Fieste, ancje par un fin propit didatic. Il materiâl produsût di Dj Tubet, di fat, al pues jessi concepît tant che imprest didatic pe divulgazion e pe riflession storiche furlane des origjins ae prime vuere mondiâl. A son disponibii i materiâls pal lavôr dai insegnants, tanc che il test de cjançon cun aprofondiments, il spartît pal flaut, diviersis basis de cjançon e i file audio facilitadôrs, regjistrâts cun diviersis velocitâts par che i arlêfs a puedin esercitâsi, in maniere plui semplice, inte esecuzion de cjançon cul flaut. La base musicâl, cun di plui, e pues jessi doprade tant che imprest par cjantâ il test de cjançon cussì cemût che al ven furnît, o fasint cambiaments daûr dal volê dal insegnant.
Date de Iniziative: Avrîl 2016Consulte i materiâi
| Ogjet | Cjale |
| La cjançon |
|
| Il test |
|
| Il video |
|
| I materiâi didatics pes scuelis |
|
