Ai 13 e ai 14 di Setembar dal 2018, il NPLD (Network to promote linguistic diversity) – Rêt par Promovi la Diversitât Linguistiche – al à sielzût Udin par inviâ la sô prime Summer University, un event formatîf indreçât ai membris di cheste Rêt, che a rapresentin uns vincj guviers regjonâi e statâi europeans là che si cjatin minorancis linguistichis.
La iniziative, nassude su propueste de ARLeF (Agjenzie Regjonâl pe Lenghe Furlane), e à ricevût l’impuartant patrocini e finanziament de Fondazion Coppieters di Bruxelles, specializade in federalisim e politichis linguistichis.
Il Campus al à dât dongje a Udin i docents e i esperts plui impuartants a nivel mondiâl su lis politichis linguistichis e i rapresentants dal Consei de Europe e de Comission europeane.
Ae viertidure de Summer University, ospitade de Universitât dal Friûl in Palaç Garzolini di Toppo Wassermann, a saran presints l’assessôr regjonâl cu la deleghe aes lenghis minoritariis, Pierpaolo Roberti; il President dal Consei regjonâl Piero Mauro Zanin; il Sindic di Udin, Pietro Fontanini; la vicepresidente dal NPLD Sabrina Rasom; il diretôr de ARLeF William Cisilino e Fabiana Fusco in rapresentance dal Ateneu furlan che al à colaborât ae organizazion di chest prestigjôs apontament internazionâl midiant dal CIRF – Centri interdipartimentâl pal svilup de lenghe e de culture dal Friûl.
Lis relazions tecnichis, in program subit dopo, a son stadis tignudis di: Vicent Climent-Ferrando de Universitât Pompeu Fabra di Barcelone (Politichis linguistichis pes societâts complessis di vuê: cirint une politiche linguistiche “juste”); Vesna Crnić-Grotić, de Universitât di Rijeka (I dirits linguistics); Sixto Molina, dal Consei de Europe (La Cjarte europeane pes lenghis regjonâls o minoritariis); Gabriele Iannàccaro, de Universitât di Milan-Bicocca che, intal so dopli intervent, al è lât insot cu la analisi sui temis leâts aes fondis sociolinguistichis pe planificazion des lenghis.
La dì dopo: François Grin, de Universitât di Gjinevre, al puartarà un so intervignût sul teme: “Economie e lengaç: storie, impostazions gjenerâls e interazions fra linguiscj e linguistiche”; Michele Gazzola, de Universitât di Lugano, al è lât insot cuntune analisi su la cuistion dal: “Monitorament de politiche linguistiche: struments politics e indicadôrs”; la relazion tra coscj e beneficis des politichis linguistichis e je stade tratade di François Vaillancourt, professôr emerit tal Dipartiment di economie de Universitât di Montréal.
Date de Iniziative: Setembar 2018Imagjins
