Une ocasion di incuintri e di confront pai students de nestre regjon par une Europe unide inte diversitât.
Suns Europe, il festival des arts in lenghe minoritarie, de edizion 2016 indevant, si decline in Scuele Europe / School Europe. Une matinade dentri intal siôr program dal Festival risiervade ai students des scuelis secondariis di secont grât dal teritori furlan.
Ogni an, in ocasion dal festival, la ARLeF e invide i students a partecipâ a chest incuintri cul obietîf di dâur ai plui zovins i elements essenziâi par cognossi, aprofondî e rifleti sul pluralisim linguistic e culturâl tant che valôr, dirit e oportunitât par ducj.
Suns Europe al è il progjet di ponte dal setôr artistic sostignût de ARLeF, che lu calcole cetant impuartant sedi parcè che al è indreçât aes gjenerazions plui zovinis, sedi parcè che al met in contat, e a confront, la lenghe furlane cun chês altris lenghis europeanis mancul pandudis.
Scuele Europe / School Europe e rapresente la ocasion, par students e docents, di assisti a une lezion conciert che e fronte i temis de educazion plurilengâl e de citadinance multiculturâl. Il dialic a plui vôs e in plui lenghis (inglês, furlan e altris idiomis de Europe), acompagnât de musiche dal vîf dai artiscj selezionâts pe finâl musicâl di Suns Europe, al è dedicât a chês realtâts dal continent comparabilis cun chê furlane.
Une grande oportunitât par viodi e sintî di dongje cemût che la diversitât linguistiche, di là di a jessi un dirit fondamentâl, e je ancje une risorse creative inestimabile.
Dilunc de matinade al Teatri Gnûf “Giovanni da Udine”, esperts di politiche linguistiche e di plurilinguisim si alternin sul palc par dâ ai students ispirazions e ideis par rifleti su chest teme.
I argoments tratâts tal incuintri a integnin:
- dirits des minorancis linguistichis; concet di lenghe di minorance, lenghe minoritarie e lenghe minorizade; câs specific de lenghe furlane;
- aprofondiments su altris minorancis europeanis in gracie dai intervents di ospits internazionâi in rapresentance des lenghis di minorance protagonistis di Suns Europe, tant che regjiscj, esperts dal setôr, scritôrs;
- esibizion dai grups musicâi protagoniscj di Suns Europe, cuntun confront e un dialic par capî miôr il lôr rapuart cu la lôr lenghe e la lôr comunitât di apartignince.
-
La edizion dal 2016
Presentade di Raffaele Serafini e à viodude la partecipazion di 360 students e docents. Lis scuelis presintis a jerin: Liceu sientific statâl G. Marinelli, Liceu C. Percoto, ISPIA G. Ceconi, Liceu artistic G. Sello, ISIS B. Stringher, ITSE C. Deganutti, di Udin; ISIS R. D’Aronco di Glemone; Convit Nazionâl P. Diacono di Cividât.
-
La edizion dal 2017
Presentade di Michele Polo e à viodude la partecipazion di 500 students e docents. Lis scuelis presintis a jerin: Liceu sientific statâl G. Marinelli, Liceu C. Percoto, ISIS B. Stringher, ITSE C. Deganutti, ITG G. Marinoni, Liceu N. Copernico, di Udin; ISIS R. D’Aronco di Glemone; Convit Nazionâl P. Diacono di Cividât.
-
La edizion dal 2018
Presentade di Michele Polo e à viodude la partecipazion di 450 students e docents. Lis scuelis presintis a jerin: Liceu C. Percoto, ISIS B. Stringher, ITSE C. Deganutti, di Udin; ISPIA G. Ceconi, Liceu sientific G. Marinelli, di Codroip; Convit Nazionâl P. Diacono di Cividât. La edizion 2018 e je stade trasmetude in direte su lis frecuencis di Radio Onde Furlane.
-
La edizion dal 2019
Presentade di Michele Polo e à viodude la partecipazion di 350 students e docents. Lis scuelis presintis a jerin: Liceu C. Percoto, ISIS B. Stringher, ISPIA G. Ceconi, Liceu sientific G. Marinelli, di Codroip; Convit Nazionâl P. Diacono di Cividât, Istitût G. Bearzi di Udin.
Imagjins
