Il prin di Setembar dal 2021, La ARLeF e Mittelfest a àn puartât in Regjon un spetacul di nivel artistic alt, un viaç inte cjançon furlane dal ultin secul, cuntune ospite di gale: Tosca, vôs straordenarie e sensibile, che pe prime volte e à cjantât in lenghe furlane.
Timp e tiere – Cent agns des miôr cjançons furlanis, al è il conciert che si è tignût li dal Teatri Ristori di Cividât, une coproduzion Mittelfest, ARLeF e Accademia Musicale Naonis, in colaborazion cul Conservatori “J. Tomadini” di Udin, ArteVoce Voice&Stage Academy e cu la poie de Regjon Autonome Friûl-Vignesie Julie e Fondazione Friuli.
Dongje di Tosca, si son dadis la volte sul palc lis cjantantis di ArteVoce Ensemble, preparadis de mestrie di Franca Drioli, che i è stade dade ancje la direzion artistiche dal event. La direzion musicâl de serade e jere di Valter Sivilotti, che al à ancje curât i rangjaments dai tocs. Insiemi, a àn rivisitât in maniere rafinade lis cjançons furlanis plui significativis dal ’900 a vuê.
«Un onôr interpretâ l’Imni dal Friûl» e a dit Tosca dopo de sô esibizion a Mittelfest, che pe ocasion e à cjantât Incuintri al doman. La cjantante e à definît la sonoritât de lenghe furlane «morbide, ma tal stes timp spiçade. E je un un pôc un spieli, par gno cont, dal caratar dai furlans. Chel jessi gropolôs in maniere primordiâl che dut câs al è dome une sorte di protezion». Fevelant des cjançons che e à puartât sul palc, e à dit: «E son di une bielece rare. Al è stât pardabon un onôr cjantâ l’imni uficiâl dal Friûl. Cheste incursion intal mont musicâl furlan mi à insiorade cun alc di unic».
Fotos di Luca D’Agostino
Date de Iniziative: Setembar 2021Imagjins
