La Agjenzie Regjonâl pe Lenghe Furlane e sarà presinte ancje chest an te suaze de edizion 2021 di Friuli Doc, la manifestazion enogastronomiche plui impuartante de regjon.
Joibe ai 9 di Setembar, aes 21.00, te cort di Palaç Morpurgo al larà in sene “Ombris tal infinît”, un spetacul teatrâl in lenghe furlane une vore cualificât, produsût dal Teatro della Sete cul finanziament de ARLeF.
La leture seniche in lenghe furlane e rint omaç ae poetiche dal innomenât scritôr furlan Carlo Sgorlon. Vôs, musichis e dissens si fondaran par creâ un vêr spetacul multimediâl che al riflet la concezion dal mont e la sensibilitât di Sgorlon.
Il spetacul che si ispire al romanç omonim di Sgorlon, publicât tal 2010 de Societât Filologjiche Furlane, al è insiorât dai contribûts di Franco Fabbro e Marco D’Agostini, che a àn curât il libri “ Carlo Sgorlon. Scrittore e intellettuale friulano” (ed. Mimesis, 2020). Cun di plui, lis ilustrazions di Serena Giacchetta, realizadis e proietadis in direte, a fasaran vivi i personaçs, lis vicendis e lis atmosferis dal romanç di Carlo Sgorlon.
La jentrade al spetacul e je libare ma bisugne prenotâsi a chescj contats: info@sportelfurlan.eu; 0432 1743400 e visâsi di puartâ il Green Pass.
Vôs che a recitin Caterina Di Fant, Michele Polo, Valentina Rivelli
Musichis Giorgio Parisi
Dissens origjinâi Serena Giacchetta
Montaç digjitâl Marco D’Agostini
Studi e dramaturgjie Marco D’Agostini, Caterina Di Fant, Serena Giacchetta, Valentina Rivelli
Produzion Teatro della Sete
Progjet finanziât de ARLeF – Agjenzie Regjonâl pe Lenghe Furlane
La presince de ARLeF a Friuli Doc, dut câs, si podarà preseâ ancje in ducj i materiâi de manifestazion. In graciis dal servizi di consulence e di traduzion linguistiche de ARLeF, di fat, i menûs e i materiâi di comunicazion a “fevelin” ancje par furlan!
Cun di plui, in graciis de colaborazion cun Promoturismo FVG, tal lôr stand in place Sant Jacum, a saran a disposizion tancj materiâi informatîfs su la lenghe furlane, i struments informatics e i servizis de Agjenzie.
