La ARLeF e rive a “dialoghi”, un festival itinerant dal gjornalisim e de cognossince, che intal 2021 al è ae VI edizion.
Fra i patrocinadôrs dal event, la Agjenzie Regjonâl pe Lenghe Furlane e propon doi apontaments dal dut in linie cui intindiments de manifestazion che e vûl contribuî a disvilupâ une cussience coletive, in graciis dal confront.
Cun di fat, i events proponûts de Agjenzie a saran la ocasion par discuti di pluralisim ma ancje par ricuardâ il plasê de scuvierte e la impuartance dal rispiet des diferencis, che nus fasin preseâ lis personis inte lôr unicitât.
La prime date di segnâ e je che dai 20 di Jugn, a Insic, aes 17.00. In chê ocasion si presentarà “La storie di Lolo il…”, un classic de leterature israeliane pai fruts che al conte di amicizie, fiducie e rispiet, cuntune trame semplice ma siore di impreviscj che i doi zovins protagoniscj a frontin cun fuarce e convinzion. Un volum editât di Forum, cul jutori de ARLeF, che al à une particolaritât uniche: al è stât voltât dal origjinâl ebraic al furlan e no esist une version taliane, un fat dal dut gnûf.
La opare di Dvora Omer, une des plui impuartantis scritoris israelianis, e je stade voltade di Davide Turello, linguist e filolic de Universitât di Bamberg (Baviere), invezit i dissens che a dan vite ai personaçs a son di Pia Valentinis, vincidore de 21e edizion dal premi Andersen talian tant che miôr ilustradore. Il libri al sarà presentât dal diretôr de ARLeF, William Cisilino e dal critic leterari Mario Turello adun cun Gabriele Zanello, docent di leterature furlane de Universitât dal Friûl. “La storie di Lolo il…” al è un volum che, cundut che al sedi destinât ai fruts, al rivarà a incuriosî ancje i grancj che a podaran imparâ, adun cui lôr fruts, cetantis peraulis de lenghe furlane pôc cognossudis: in sumis, dut un mont di scuvierzi!
Il secont apontament al è pai 2 di Lui aes 10.00, tal Istitût “Nostra Signora” di Gurize. Al è indreçât ai students e si intitule “Gurize: une storie, tantis lenghis. Pluralisim linguistic e culturâl di une impuartante crosere de Europe”.
A contâ trop impuartante che e je la pluralitât linguistiche dal teritori regjonâl al sarà Michele Calligaris, operadôr dal Sportel Regjonâl pe Lenghe Furlane de ARLeF, che al è ancje insegnant intai cors pratics di lenghe furlane de Societât Filologjiche Furlane e atîf di agns intal setôr de tutele des minorancis linguistichis storichis dal Friûl. L’obietîf al sarà pontât in particolâr sul Gurizan, une aree di grant interès sedi storic che linguistic pal passât dal Continent, ma che e salte fûr masse tart intai libris di test plui comuns.
