“Il Ream dai Fruts”, “Sacheburache”, “Vosutis te sachete” a son i trê gnûfs progjets video musicâi in lenghe furlane presentâts e finanziâts de ARLeF e dedicâts ai fruts dai 3 ai 10 agns.
Si trate di 27 videos in dut, caraterizâts dal lengaç sempliç e universâl de musiche, che a fasaran balâ e cjantâ par furlan i plui piçui, e no dome.
“IL REAM DAI FRUTS“
Al è l’adatament dal progjet internazionâl nassût in Argjentine “El Reino infantil”, pe prime volte in lenghe furlane. Puartât in Italie di Azzurra Music, cun tescj par furlan di Alberto Zeppieri de Associazion Numar Un, al è componût di videocjançons animadis, cjantadis di artiscj stimâts de sene musicâl furlane e cognossûrts al grant public (Bobby Solo, Dario Zampa, Tinkara, Frizzi Comini Tonazzi, Silvia Michelotti, Franco Giordani, Giulia Daici, Simone Rizzi, Irene Dolzani, Stefano Nardini, il côr di Vôs Biancjis Artemia e lis piçulis Dania Lascialfari e Sofia Maria Rizzi). Pe prime stagjon a son stadis realizadis 12 cjançons, cui relatîfs video-clips e cu la lôr trasposizion su supuart DVD e sul canâl YouTube. Presintis ancje lis vôs di cualchi comic famôs, tant che “Mandi Mandi”, Sdrindule, Catine, Galax e Toni Merlot.
“SACHEBURACHE”
Al è un progjet origjinâl di Belka Media che al propon lis filainis furlanis intune gnove vieste musicâl, par rindilis adatis, gjoldibilis e fruibilis ancje aes gnovis gjenerazions; une gnove leture in clâf “millennial” destinade ae rêt (in particolâr YouTube).
La serie di 8 pontadis e je presentade di Martina Zamaro che, de sô fatorie dulà che e à tancj amîs speciâi, nus propon in ogni pontade une naine de tradizion orâl furlane, interpretade in dôs versions: une classiche di bande de musiciste Nicole Coceancig, e une in stîl rap, cjantade dal rapper Dj Tubet.
“VOSUTIS TE SACHETE”
Al è un progjet de Associazion musicâl “Bertrando di Aquileia” che al propon 7 cjançons ineditis e origjinâls in lenghe furlane, cjantadis dai fruts de Associazion. A son acompagnadis di videos divertents e colorâts, interpretâts dai siei zovins protagoniscj, e si caraterizin par une modernitât in stât di coinvolzi i plui piçui in maniere direte e metiju in contat cu la lenghe furlane, lis sôs peraulis e la sô musicalitât.
