Si è concludude intai dîs passâts a San Jacum di Galizie, in Galizie, la trê dîs di confront e di aprofondiment tra i partners europeans dal progjet RUSH Erasmus+ (acronim di Re and Up Skilling Horizons), sul valôr culturâl dal plurilinguisim e su la impuartance des lenghis minoritariis intal setôr de istruzion. Obietîf primari di RUSH – che di là dal Friûl pe Italie, al cjape dentri la Galizie pe Spagne e la Istrie pe Cravuazie – al è di fat chel di analizâ, di aprofondî e di disvilupâ lis tematichis relativis aes competencis di meti in at de bande dal insegnant plurilengâl in Europe, cul ûs de lenghe minoritarie.
La ARLeF e à partecipât al incuintri tant che partner pal Friûl-Vignesie Julie adun cul Convit nazionâl Paolo Diacono, coordenadôr dal progjet trienâl. L’incuintri al è stât la ocasion par presentâ ai partners il gnûf sît internet plurilengâl di Rush, realizât e gjestît de Agjenzie (intes versions furlan, talian, galizian, spagnûl, inglês). Il strument al à une impuartance particolâr stant che al à dentri il prin nucli di materiâi che a componin il Centri documentâl dal progjet, che di cumò indenant al podarà jessi implementât cul materiâl didatic di chei altris partners.
Dilunc dal incuintri, il diretôr William Cisilino al à presentât, cuntune relazion aprofondide, la situazion plurilengâl e lis politichis linguistichis metudis in at de nestre regjon. Pal Convit Paolo Diacono di Cividât a jerin presints invezit il Retôr Clementina Frescura e il viceretôr Vittorino Michelutti, che al à fevelât dai obietîfs di Rush e al à dât un cuadri complessîf des ativitâts disvilupadis fin cumò te suaze dal progjet.
Di là dai incuintris transnazionâi, de formazion dai docents e dal scambi di grups di arlêfs dal cicli primari e dal cicli secondari di prin grât, il percors progjetuâl al previôt ativitâts di ricercje e azion. Intai trê agns e je previodude la realizazion di doi prodots: lis Liniis Vuide sul portfolio des competencis dal docent plurilengâl, voltadis in 6 lenghis (inglês, talian, spagnûl, cravuat, furlan e galizian) e la creazion di un Centri Risorsis european pal scambi e il confront tra docents in Europe, che al metarà adun ducj i materiâi pal insegnament plurilengâl, fats dai docents, cun modui inovatîfs par gnovis situazions di aprendiment e in plui al sarà spazi ancje pal monitorament.
L’event in Galizie al è stât ancje la ocasion par un confront su la programazion des ativitâts di fâ inte seconde part dal progjet RUSH, che al previôt tant che prossime tape un scambi di grups di arlêfs dal cicli primari e dal cicli secondari di prin grât, il prossim Otubar, in Galizie.
