Cun vinars ai 8 di Otubar e tache la seste stagjon di “Maman!“, la trasmission televisive par fruts in lenghe furlane. E larà in onde su Telefriuli ogni vinars, aes 18.30, e in repliche la domenie, aes 07.00 e aes 13.00.
Chest an, però, Maman! al torne cuntune grande novitât: il carton animât “Horaci l’Inuit“: une serie catalane, voltade par furlan in graciis de ARLeF, che lu à produsût su licence di Videoplugger Ltd, e curade de Delta Studios e dal CSS Teatri stabil di inovazion dal FVJ, cu la direzion de dopleadure di Rita Maffei.
Il carton al è pensât par furts dai 3 ai 6 agns, ma al savarà cjapâ dentri ancje chei plui granduts, fin ai 9 agns.
I protagoniscj dal gnûf carton animât a son Horaci e Sedna, doi eschimesuts che a fevelin par furlan e che in 35 pontadis a vivin aventuris di ogni sorte ator pal Artic, plen di ors polârs, siamans, igloos e kayaks.
Horaci e Sedna, duncje, si zontin a chei altris protagoniscj di Maman!, tant che Daria, il so gjat Vigji e sô cusine Bete, che tes tantis rubrichis dal program a fasaran imparâ, scuvierzi e divertî i plui piçui.
Leturis, poesiis, barzaletis, cjançons, zûcs e videotutorials a vegnin presentâts cul obietîf di meti i fruts a contat cu la lenghe furlane e cul plurilinguisim in maniere divertente.
