I arbui a son come i fruts: nissun al è compagn di chel altri.
Chest libri al è il risultât des imagjins e dai pinsîrs dai fruts che a son saltâts fûr dilunc dal cicli di laboratoris che a àn cjapât part lis scuelis de infanzie e primariis dai comuns di Aquilee, di Flumisel, di Tierç e di Vile Visintine. L’ûs dai nons e dai adietîfs specifics che a caraterizin lis pagjinis di chest lavôr a rapresentin une sielte didatiche precise in maniere che chest librut al podedi deventâ un strument di lavôr preziôs sedi in classe sedi pe ativitât di leture. L’arbul al è considerât di ogni civiltât la essence stesse de vite e al caraterize il paisaç furlan cui filârs di morâr fin ai pierçolârs di Flumisel. Il percors, tacât intune cjase tipiche furlane cuntune conte inmagante suntun bosc cidin, si è sierât cuntun laboratori creatîf a scuele li che i fruts a àn podût sperimentâ tecnichis diferentis par costruî i arbui.
