Realizade di un artist des Marcjis, e je il “testemoni” che di chest an indenant si scambiaran te cerimonie civîl i sindics dai comuns che a ospitin la Fieste
Al è un drap cuadrangolâr magnific, di sede grise celeste, cun tal mieç une acuile cul cjâf indreçât a çampe, che e à cuarp, çatis e alis di colôr zâl, e sgrifis rossis. Al è chest il simbul li che ducj i furlans, ancje i coregjonâi tal forest, si identifichin. E je la bandiere dal Friûl, une des plui antighis de Europe, vuê conservade intal Museu dal Domo di Udin. E jere part dal aventari funerari dal patriarcje Bertrant di Saint Geniès, restât su la catidre di Aquilee dal 1334 al 1350, e copât in maniere barbare di une conzure di nobii furlans.
In ocasion des celebrazions de Fieste de Patrie 2023 a Caprive, su iniziative dal Istitût Ladin Furlan “Pre Checo Placerean” e de ARLeF-Agjenzie regjonâl pe lenghe furlane, e je stade presentade la riproduzion fedêl de bandiere storiche. Il drap – tignût intun satûl di len realizât di pueste – di cheste edizion de Fieste, e par dutis chês dal avignî, al è il “testemoni” che i sindics dai comuns che a ospitin lis celebrazions si scambiaran sul tacâ de cerimonie civîl.
La riproduzion fedêl e je opare dal artist des Marcjis Francesco Pellegrini, che al à realizât plui di 150 bandieris pai grups storics di mieze Europe. Il so al è stât un lavôr di fin, risultât prime di un studi atent dal origjinâl, e po dopo di un mês e mieç di lavôr intens. Pellegrinial à doprât il stes materiâl dal drap origjinâl, il taffetà di sede, in particolâr il taffetà 30 e il 40, cifris che a segnin il numar di fîi di sede doprâts par intiessi un centimetri di tiessût.
Come pal origjinâl, a son stadis unidis te part centrâl dôs strichis di stofe altis sui 35 centimetris. Al à duncje perfezionât lis misuris, puartant il toc di tele ae dimension de bandiere origjinâl: 69 par 73,4 centimetris. «La dimension de bandiere antighe – al à spiegât Pellegrini – e corispuint a chê dai tocs di tele tiessûts cul telâr in ete medievâl. Stant però che la sede e je tant complicade di lavorâ, cun ogni probabilitât i tocs a misuravin la metât, e duncje al è par chest che la bandiere dal Beât e je costituide di dôs strichis di tiessût cusidis insiemi».
Nol è stât mancul complès (anzit, il contrari) riprodusi la acuile che e domine su la sede celeste: Pellegrini al à riprodusût il dissen, lu à trasferît su cartoncin par dopo ripuartâlu su la sede. A chel pont, al à scomençât a cusî e a dâi forme. I ponts doprâts par tratinâ la acuile di sede zale a son di dimension pardabon minime (di mieç milimetri a un milimetri), fats cun fîi dal stes spessôr di chei medievâi: «O vevi za viodût ponts simii su lis toniis di Sante Clare e di Sant Francesc, conservadis a Assisi – al à contât -. A somein fats a machine, di tant fis che a son». Duncje, par realizâ te maniere miôr il dissen e par che al fos il plui fedêl pussibil al origjinâl, al à propit contât un par un i ponts, e al à scomençade la riproduzion.
Un lavôr di pazience estreme, di precision e di maestrie, cuntun risultât che al è pardabon une opare mestre di art tessile.
Cjale ancje dute la iniziative de Fieste de Patrie dal Friûl di domenie ai 16 di Avrîl a Caprive
