La Agjenzie Regjonâl pe Lenghe Furlane e la Universitât dal Friûl a àn presentât i gnûfs struments didatics che a permetaran di inviâ la certificazion de lenghe furlane.
Ducj i materiâi si puedin comprâ sul sît de cjase editore Forum a chescj links:
Volum – Furlan nivel A
Volum – Furlan nivel B
Volum – Repertori di regulis pal nivel C
Al è un dai prins pas previodûts dal acuardi firmât dai doi ents li che dutis dôs lis parts si son impegnadis a colaborâ inte organizazion di cors di formazion e inte realizazion e publicazion di tescj e struments didatics par imparâ la lenghe furlane, cul obietîf di preparâ cui che al vueli otignî la certificazion linguistiche pal furlan, in atuazion de leç regjonâl 29 dal 2007.
I trê volums – curâts de professore Fabiana Fusco e risultât dal lavôr plurienâl fat dal Ateneu furlan cu la poie dal Assessorât regjonâl ae Istruzion – a permetaran di valutâ i nivei progressîfs di competence (A, B e C), su la fonde di ce che al è previodût dal Cuadri comun european su lis lenghis.
La seconde fase dal progjet – che si inviarà in curt – e previôt la formazion dai prins certificadôrs che a varan di valutâ lis competencis linguistichis di cui che al domandarà di jessi certificât pes capacitâts di scolte, leture, conversazion, scriture e interazion par furlan.
La ARLeF e vûl partî cui prins esams di certificazion fra la fin di chest an e il tacâ dal prossim.
La certificazion e je un passaç fondamentâl par alçâ il status dal furlan, come che al sucêt par dutis lis lenghis sometudis a passaçs di verifiche, di formazion continue e di acès a percors colegâts ae lôr certificazion finâl.
Par che une lenghe si slargji e par che e davuelzi in maniere zovevule il so rûl, si à ancje di aciertâsi che e vegni doprade, massime intal scrit, in maniere corete, de bande di insegnants, operadôrs linguistics, funzionaris publics o altris sogjets clamâts par leç a cognossi la lenghe.
Par informazions sui materiâi pe certificazion linguistiche de lenghe furlane, si pues scrivi a: arlef@regione.fvg.it
