Protagoniscj trê students dal “Magrini Marchetti” di Glemone
Si è sierade intes setemanis passadis, a Brussel, la seconde edizion di ECCA – European Charter Classroom Activities (Ativitâts in aule su la Cjarte europeane), progjet cofinanziât de NPLD – Network to Promote Linguistic Diversity (Rêt pe promozion de diversitât linguistiche), la rêt paneuropeane cun sede a Brussel che e je ative intal cjamp des politichis linguistichis. ECCA al è nassût intal 2019 cun chê di disvilupâ un percors didatic par aprofondî i ponts de Cjarte europeane des lenghis regjonâls o minoritariis. Une iniziative che e à fat interagjî tantis regjons, cjapant dentri scuelis e arlêfs di une bande e universitâts e sogjets istituzionâi di chê altre.
Fra chescj ancje il Friûl, cu la poie de ARLeF e dal Istitût statâl di istruzion superiôr “Magrini Marchetti” di Glemone che al à partecipât cun trê students compagnâts de professore Nicoletta Bosa. La aventure di Nicholas Forgiarini, Caterina Picco e Giorgia Giacobbi e je scomençade cu la partecipazion al concors ECCA: ur è stât domandât di fâ un video par contâ se, inte lôr tiere, al sedi costum fevelâ plui lenghis e parcè che e valedi la pene di visitâle. Vinçût il concors, i trê students in Mai a son stâts tes isulis Baleârs, dulà che a àn podût frecuentâ il campus ECCA, adun cui rapresentants des vot regjons linguistichis europeanis, ducj dai 14 ai 17 agns. I fantats e lis fantatis a àn partecipât a un percors che al veve tant che teme principâl lis lenghis, cun diviersis ativitâts.
