Lei storiis ai fruts ju jude a cressi miôr tant che adults e al jude i adults a no dismenteâ di jessi stâts fruts. E je cheste la filosofie di fonde dal progjet nazionâl Nati Per Leggere – Nassûts Par Lei (NPL), che al à cjatât la sô declinazion par furlan midiant dal Cors di formazion par letôrs volontaris in lenghe furlane, organizât inte suaze dal progjet “Brie di conte, don di lenghe” dal Ent Regjonâl Teatrâl dal Friûl – Vignesie Julie, de AIB Associazion Taliane Bibliotechis e de ARLeF.
Il progjet, dedicât ae prime infanzie (fruts tra i 0 e i 5 agns), si ispirave ai principis e aes modalitâts di realizazion dal progjet nazionâl NPL, aprofondint i temis de promozion de lenghe furlane midiant la narazion, la leture a vôs alte e il teatri di figure. La ativitât centrâl dal cors e je stade chê de formazion dai letôrs volontaris di NPL e dai operadôrs dai Sportei Linguistics di Lenghe Furlane atîfs sul teritori. Al cors, che si è davuelt ae fin dal 2013, a àn partecipât cun di plui insegnants, bibliotecaris, educadôrs e ancje citadins interessâts.
Il grup di letôrs volontaris nassût di Brie di conte al è ancjemò atîf e disponibil a fâ leturis animadis. Par informazions e contats:
OBIETÎFS
L’obietîf principâl dal progjet al jere la formazion di un grup di letôrs volontaris cualificâts par tignî sù leturis animadis di contis in lenghe furlane pai fruts e pes lôr fameis, dant cussì vite a Nassûts Par Lei, la version in marilenghe di Nati Per Leggere (NPL). Brie di conte al à pontât ancje a sensibilizâ i adults (soredut fameis, ma ancje educadôrs e operadôrs culturâi) al rapuart precoç cu la lenghe, la scriture e la culture furlane, promovint lis interconessions cul contest locâl.
Lis leturis in lenghe furlane in etât prescolâr, a contribuissin a insiorâ il patrimoni linguistic dai fruts: cressint il numar di peraulis che a cognossin e cres la lôr pussibilitât di cognossi e interagjî ad implen cu la realtât ator di lôr.
STRUTURE DAL CORS
Il cors al è stât ativât tai comuns di Tavagnà e di Codroip tra Otubar e Novembar dal 2013 e si è dividût in 4 incuintris formatîfs, par un totâl di 9 oris. Lis lezions a jerin incentradis su lis motivazions e i obietîfs de leture a vôs alte e sui imprescj e lis tecnichis de narazion, cun cualchi ispirazion gjavade dal teatri di figure.
Lis lezions lis àn fatis Monica Aguzzi, atore e educadore, e Giorgio Cozzutti, pianist, compositôr e docent di musiche.
Il seminari pe presentazion/condivision dai obietîfs e l’incuadrament pedagogjic e leterari dal progjet lu à davuelt Rita Valentino Merletti, studiose, autore e esperte in progjets di promozion de leture.
MATERIÂI
Gli Irrinunciabili: prime bibliografie furlane pai letôrs volontaris… e no dome.
Prima e je la “prime bibliografie furlane” creade de rêt di bibliotecaris NPL de regjon, e cjape dentri une prime selezion di titui cul obietîf di prontâ une “scansie” virtuâl e libare des oparis di cualitât in lenghe furlane, dedicadis ae prime infanzie.
I criteris che a àn vuidât la selezion a son stâts: amabilitât dal test par contignût naratîf e rese linguistiche, ilustrazions e grafiche curâts e no banâi, atenzion e vicinance al mont imagjinari dai fruts e grât tratîf dal prodot editoriâl intal so complès.
Par consultâ i tescj de bibliografie, cjalcjâ achì
