La Cjase des Paveis di Bordan

Intal mês di Lui dal 2016 la ARLeF, il Comun di Bordan e la cooperative Farfalle nella testa a àn firmât un protocol di intese, inviant une colaborazion par permeti ae lenghe furlane di jessi simpri plui presinte inte ativitât promozionâl, informative, didatiche e turistiche de realtât eco museâl Cjase des Paveis di Bordan, la plui grande cjase des paveis in Italie.

Partint de cussience che il furlan al rapresenti une oportunitât straordenarie par valorizâ il teritori, la sô biodiversitât e la sô ricjece culturâl e linguistiche, fasint di stimul e di element distintîf pal marketing teritoriâl, si è rivâts ae realizazion de cartelonistiche plurilengâl e ae realizazion di materiâl promozionâl bilengâl, indreçât soredut aes scuelis. Intal ambit de colaborazion, e je stade fate la version par furlan dal sît internet e a son stâts voltâts in lenghe furlane tancj articui di divulgazion sientifiche e aprofondiments.

Visite il sît de Cjase des Paveis di Bordan

La Cjase des Paveis pes scuelis

Crodint che la educazion ambientâl e rapresenti un jutori inte costruzion di une societât sostignibile e che e promôf compuartaments cussients, la Cjase des Paveis e ufrìs un supuart ae ativitât didatiche in lenghe furlane, proponint stimui gnûfs e interessants pai fruts des scuelis dal Friûl.
Par esempli al è pussibil visionâ il catalic de ufierte formative dute par furlan (an scolastic 2015/16), dulà che a son stâts inserîts laboratoris specifics in lenghe furlane par fruts, students e adults.