CUI CHE AL SA IL FURLAN
AL SA DI PLUI

Fevelâ par furlan ai fruts fin di piçui al vûl dî tirâju sù lant daûr di un model educatîf moderni, ma soredut regalâur un bagai preziôs e util par cualsisedi percors di vite che a volaran cjapâ. I vantaçs di une educazion plurilengâl a son une vore e a son confermâts des ricercjis sientifichis: i fruts bilengâi a àn plui facilitât tal imparâ altris lenghis, come l’inglês, a son furnîts di capacitâts logjichis e matematichis miôr, a àn plui abilitâts di esecuzion, si disconcentrin di mancul, a son plui creatîfs e vierts al mont.

Cui che al sa il furlan, al sa di plui e je une campagne di informazion e di sensibilizazion prontade de ARLeF par fâ cressi la cussience che il furlan al è une risorse impuartante pe educazion linguistiche.

SPOT VIDEO CUDUMARS

Il moment plui impuartant de zornade li che la famee si cjate adun al è il gustâ. Al è chest il set dal spot tv che al à tant che protagoniste une cubie zovine cun lôr fîs. I gjenitôrs a fevelin par furlan tra di lôr, ma cuant che si indrecin al fi, che nol vûl mangjâ i cudumars, a passin al talian. Ma, ve mo, che e salte fûr une sorprese…

• Scuvierç di plui

  Intal spot Cudumars, l’intervent di Catine (Caterina Tomasulo) fate piçule piçule, che par magjie e jes fûr de pignate, al torne a puartâ il seren in famee. Cemût? Al baste fevelâi par furlan e il piçul Fabio, che fin a un moment prime si refudave di mangjâ i cudumars, si bute cun gust sul plat. Catine e indrece al public un messaç impuartant: fevelâ ai fîs par furlan al vûl dî ufrîur tancj vantaçs cognitîfs, sociâi e culturâi. Ma dut al ven zuiât cun ironie e cun lizerece, sedi pe sielte di fâle deventâ un piçul spirfolet che si môf su la taule e sedi pal significât dopli dal tiermin cudumar che, in plui di jessi une ortaie, par furlan al è un mût simpatic par cjoli vie un amì.
  
  Testimonial dal spot – come dal rest de campagne – e je, no par câs, une interprete ecezionâl che no je di divignince furlane, ma che e je rivade a vê grande innomine propit recitant par furlan. Chest par fâ viodi che jessi plurilengâi al è pardabon une oportunitât.
  Adun cun Caterina Tomasulo, tal spot a recitin professioniscj come Giulia Cosolo, Paolo Mutti e doi interpretis une vore zovins cun grande cjarie espressive, Gabriele Bardus e Emma Cossarini.

SPOT RADIOFONIC

Il spot radiofonic al precise daurman l’obietîf de campagne: la impuartance di fevelâ par furlan in famee, te relazion tra gjenitôrs e fîs e in chê fra nonos e nevôts, par ufrî ai plui piçui ducj i vantaçs dal plurilinguisim.

• Scuvierç di plui

  La protagoniste e je Catine (Caterina Tomasulo), che cu la sô fuarte cjarie di simpatie e un lengaç sclet e ironic, e puarte il messaç che Cui che al sa il furlan, al sa di plui. Ae sô vôs, e va adun chê di Fabiano Fantini, che al lei il messaç istituzionâl che al siere il spot.

ADV

La campagne di stampe si davuelç cun anunzis a pagjine interie sui cuotidians, setemanâi e mensîi su cjarte principâi dal teritori di lenghe furlane.

• Scuvierç di plui

  La testimonial de campagne e je Catine (Caterina Tomasulo), che cul sproc Cui che al sa il furlan, al sa di plui e cu la complicitât de sô bocje di ridi, intant che e drece il dêt viers il spetatôr e marche la impuartance di ce che e dîs. Il fonts narançon de pagjine, un colôr che al pant energjie e vitalitât, al da ancjemò plui fuarce al messaç trasmetût di Catine. Incuadrant il QR Code metût da pît de pagjine, il letôr al rive al spot video de campagne.

SOCIAL MEDIA

La campagne social e je impuestade su lis plateformis digjitâls Facebook, Instagram, YouTube e TikTok, par un periodi di cinc setemanis.

• Scuvierç di plui

  La strategjie di social media marketing e previôt une veicolazion fuarte dal spot video sui diviers canâi de ARLeF, in maniere organiche e sponsorizade, cun chê di tocjâ dut il public furlanofon e sigurâ la cuviertidure complete par gjenar e fasse di etât. Di pueste pai social e je stade fate une version li che il spot al è anticipât di un minitrailer, che al ven pandût in formât di Reel pes plateformis Meta, TikTok e midiant di anunzis pre-roll su YouTube. La sô distribuzion e je previodude ancje par mieç di  WhatsApp.

CREDITS

• Scuvierç di plui

  Coordenament gjenerâl
  ARLeF-Agjenzie regjonâl pe lenghe furlane
  William Cisilino
  CALT
  Adriana Cruciatti

  Spot Video
  Produzion: Quasar Corporate
  Sogjet: William Cisilino
  Scrit di: William Cisilino, Adriana Cruciatti,
  Giorgio Milocco, Alessandro Zanuttigh
  Regjie: Giorgio Milocco
  Organizazion gjenerâl: Andrea Badin
  Diretôr de fotografie: Tommaso Balestra
  Eletricist: Davide Cancian
  Prin assistent telecjamare: Federico Valente
  Assistent: Samyo Antoniali
  Assegnât ai imprescj: Gilberto Antoniali
  Fonic: Riccardo D’Agostini
  Acessoriste: Miriam Causero
  Assistente de acessoriste: Erika Nardini
  Imbeletadôr: John Jeimar Pena
  Casting: Pilar Vila
  Editing, compositing e color correction: Filippo Di Primio
  Durade: 30’’
  Lenghis: furlan – talian
  Interpretis:
  Catine (Caterina Tomasulo)
  Giulia Cosolo – mame
  Paolo Mutti – papà
  Gabriele Bardus – Fabio
  Emma Cossarini – sûr

  Spot Radiofonic
  Produzion: Radio PuntoZero
  Sogjet: William Cisilino
  Scrit di: William Cisilino e Adriana Cruciatti
  Durade: 30’’
  Lenghe: furlan
  Vôs:
  Catine (Caterina Tomasulo)
  Fabiano Fantini

  Campagne grafiche
  Mauro Ciani
  Virginia Ruano

  Consulence linguistiche
  Sportel regjonâl pe lenghe furlane
  Michele Calligaris
  Veronica De Giorgio

  Aministrazion
  Federica Del Pino (ARLeF)
  Marina Valentinis (ARLeF)

  Un ringraciament a
  Vania Pettoello (ARLeF)

Condivît