Ecolunari A&T 2000

L’Ecocalunari di A&T2000 – societât cun capitâl public che dal 1996 si interesse di gjestion integrade dal cicli dai refudums – al è nassût intal 2007 cul inviament de racuelte diferenziade puarte par puarte, tant che strument par ricuardâ ai utents lis modalitâts di conferiment des diviersis tipologjiis di refudums. Dopo diviersis edizions dedicadis ai temis ambientâi, la edizion dal 2016 e à volût fâi onôr ae leterature furlane, contant cierts paisaçs rapresentatîfs dal Friûl midiant la vôs di poetis e di scritôrs locâi. Di chi il titul dal calendari, “Lis vôs dal paisaç – viaç te tiere e te culture dal Friûl”, realizât cu la colaborazion de ARLeF.

 

Lis sôs pagjinis a àn dât spazi a cualchidune des vôs plui ativis de leterature contemporanie, Maurizio Mattiuzza, Umberto Valentinis, Guglielmo Cerno (autôr di lenghe slovene), ma ancje poetis e scritôrs dal passât plui dongje, Pierluigi Cappello, Franco Marchetta, Dino Virgili, Angelo Maria Pittana, Siro Angeli, Amedeo Giacomini, Elio Bartolini, Maria Forte, Celso Cescutti.

A testemoneance de pluralitât linguistiche dal Friûl, dongje dai tancj tocs leteraris in lenghe furlane, al à cjatât puest ancje un toc par sloven, che intes sôs variantis al ven fevelât intes Vals de Tor, teritori servît di A&T2000.

Ducj i tescj gjenerâi – dai dîs de setemane aes indicazions sul coret conferiment dai refudums – a son in version bilengâl (furlan-talian).

Tra la fin dal 2015 e la fin dal 2016, l’Ecolunari al è stât distribuît in plui o mancul 115 mil copiis intai passe 40 comuns de ex provincie di Udin dulà che A&T2000 e gjestìs il sisteme di racuelte puarte par puarte.