INT/ART

Sintî locâl agjî globâl

Il progjet INT/ART si articole in trê seriis di cinc pontadis ognidune, sui temis de musiche, des arts visivis e des arts performativis.
INT/ART, vâl a dî INT di ART. Ma ancje INTernational/ARTist.
Ce vuelial dî jessi zovins, jessi artiscj, jessi furlans, frisons, galês… cun identitâts individuâls, coletivis e une lenghe minoritarie tant che simbul di apartignince a une comunitât che e je une vore piçule te globalizazion planetarie onivare?

INT/ART al vûl stimolâ une riflession su la influence e il rûl che la identitât linguistiche e culturâl e à pai zovins creatîfs intes diviersis dissiplinis artistichis.

Ce vuelial dî jessi artiscj zovins inte provincie europeane? Trop isal complès esprimi la proprie creativitât intune lenghe minoritarie? La lenghe puedie determinâ une sensibilitât artistiche divierse? Cemût si maridino lis propriis lidrîs culturâls cu la dibisugne di contaminazion e di inovazion? A son chestis lis domandis che INT/ART ur vûl dâ rispueste.

INT/ART al è stât fat de societât Agherose cul contribût de ARLeF (Agjenzie Regjonâl pe Lenghe Furlane) e dal Fonts regjonâl pal Audiovisîf. Lis trê seriis a son stadis realizadis intai agns 2016, 2017 e 2018, mandadis in onde sui canâi de Rai F-VJ e a son stadis presentadis al public in variis manifestazions.

Visite la pagjine Facebook

• INT/ART – prime serie: MUSICHE

  La prime serie e à tant che protagoniscj i musiciscj furlans des ultimis gjenerazions, che si slargjin dal virtuosisim esecutîf ae origjinalitât tai tescj; de vocazion a contâ la proprie tiere ae capacitât di strissinâ il public dilunc des esecuzions.

  

  Dek Ill Ceesa (rapper) – Dai prâts de Cjargne ai palcs dal hip hop metropolitan, il Dek nol à mai lassât di contâ de sô int e lis dificoltâts de sô tiere di divignince, cuntune scletece e une fuarce che a restin unichis. Storiis di paîs deventadis poesie di strade, dulà che ducj i zovins a puedin ricognossisi.

  Elsa Martin (cjantante) – La carateristiche principâl di cheste zovine cjantante e je chê di pandi, cu la scletece de sô vôs, une apartignince totâl al mont de art, dedicant anime e cuarp. Une particolaritât che tancj musiciscj di nivel alt a sintin, adun cuntun public atent, preseant dute la sô profonditât.

  Rudy Citossi (cjantautôr) – Inventôr di storiis peadis al mont che al sa di sals de Basse furlane, storiis cussì incredibilis di someâ veris. Chest osservadôr zovin e atent de realtât che i sta dulintor al rive a imbombî i tescj des sôs cjançons cu la essence profonde de gjenerazion dai furlans de so etât, e a trasformâle, cun ironie e inzen, intune materie leterarie inedite.
  Visite il sît dai Laipnessless

  Caia Grimaz (cjantante) – La vôs tant che strument di une passion che e dure di dute une vite. Fâ teatri e musiche a contat cu lis espressions artistichis plui impuartantis de nestre ete e une formazion une vore salde, le àn puartade a jessi une des cjantantis e interpretis di musiche popolâr e culte plui ricercjadis a nivel internazionâl.

  Alessandro Mansutti (baterist) – Inzegnîr e musicist jazz, baterist rafinât in stât di sunâ sedi ai concierts dal Quirinale a Rome, sedi tai piçui club di provincie. La personalitât di chest zovin musicist si pues meti in struc cuntune frase: tal jazz, come ancje te vite, sbaliâ ritmi al pues deventâ un at creatîf.

  Ciale il promo de prime serie
• • INT/ART – seconde serie: ARTS VISIVIS

    La seconde serie e je dedicade ai protagoniscj de creativitât in lenghe furlane te suaze des arts visivis. A son zovins ilustradôrs, esperts di grafiche cul computer, creatôrs di fumuts, fotografs, scultôrs, artiscj.

    

    Alice Durigatto (fotografe) – A son moments dulà che i moviments dai cuarps e lis espressions de muse a fevelin un lengaç che dome la fotografie e rive a cjapâ. Il sens de ricercje di Alice al sta juste in chest, e al è ancje l’obietîf dal so lavôr tal mieç de int dai concierts o tes manifestazions popolârs de sô tiere. Une ocasion di cognossince e curiositât dal mont che i sta ator.
    Visite il sît di Alice

    Carin Marzaro (ilustradore) – Une dissegnadore e une grafiche cuntun segn carateristic, e colabore cun gjornâi e e invente ilustrazions, cuviertinis di discs e motîfs grafichis par grups musicâi, events e festivals. Tal stes timp, e sune ancje il bas eletric cun perizie e maestrie e e fâs so un mont intîr di riferiments che a deventin imagjinis simbolichis e significativis dal mont furlan di vuê.
    Visite il sît di Carin
    

    Edi Carrer (scultôr) – Inventôr di formis e di sugjestions che a vegnin de fuarce des sôs visions, risultât di une sedimentazion lente di esperiencis e di storiis vivudis. Dal stât salvadi e naturâl des gjavis antighis, la piere che lui al lavore e pues deventâ cualsisei robe. E podarà jessi une astronâf aliene che e devente un crani, o une fantasime de infanzie pierdude che e torne a vivi intun piçul pâr di scarputis di marmul blanc, o ancje…
    

    Luca Malisan (fumetist) – Al rive a inventâ monts intîrs cu lis sôs taulis graciis ae maestrie de grafiche al computer. Al da vite a lûcs che a vegnin di altris timps e a gjeografiis imagjinadis e dut câs familiârs tai voi di chei che a cjalin. Cheste e je une carateristiche dai lavôrs di Luca che, adun cu la sô scuadre, al traspuarte i letôrs in paîs lontans e di fantasie, dulà che o podìn ricognossi il profîl des monts, lis architeturis severis dai cjistiei e lis sfumaduris dai lâts dal so Friûl.
    Visite il sît di Luca

    Michele Bazzana (artist visîf) – Il colôr smamît o il polvar fin a son passaçs di une azion finide; a son ce che al reste di une operazion che no determine une funzion. Achì e tache la ricercje di Michele, che al puarte chest ecès in struturis, in fotografiis o in performances che a svicinin a une spiete che, tal ultin, si risolf intun nûl di polvar o di pixel. I siei lavôrs a son un banc di prove dulà che e ven metude in discussion la potenzialitât dal machinari. Il plui des voltis a son l’erôr, la variabil o la prove che a deventin la uniche costante dal so lavôr.

    Cjale il promo de seconde serie
  • • INT/ART – tierce serie: ARTS PERFORMATIVIS

      La tierce serie e je dedicade ai protagoniscj des arts performativis: teatri, danze contemporanie, performances, arts dal circ e la gaugarie. A son artiscj che a crein spetacui cu la vôs, cui moviments dal cuarp, che a doprin i struments dal circ o che a fasin spetacui di strade.

      

      Aida Talliente (atore e regjiste) – Prontâ un spetacul di teatri nol è dome un lavôr inteletuâl, e covente ancje une preparazion fisiche. Aida lu à imparât in chescj agns graciis al so lavôr di racuelte, ator pal mont, di storiis che no àn vôs, scognossudis o dismenteadis. A son storiis di oms e di feminis che a segnin il so percors di ricercje teatrâl, intim e personâl. Ce che al ven puartât ae atenzion dal public a son lis peraulis, i moviments e i voi dai protagoniscj, adun cun dute la lôr profonde umanitât.
      Visite il sît di Aida
      

      Anna Gubiani (dramaturghe) – Par vie di un voli simpri critic e di une esperience decenâl di consulence artistiche, Anna e je simpri ae ricercje de cualitât e dal perfezionament di tescj, spetacui e programs teatrâi. E fâs cheste ativitât sedi dentri dal sisteme dai teatris stabii todescs, sedi in contescj plui specifics come la dramaturgjie furlane. Il so lavôr si fonde sul cjalâ cun atenzion i mecanisims umans: une risorse infinide inte creazion di ogni lengaç artistic dal dì di vuê.
      Visite il sît di Matearium

      Davide Perissutti (artist dal circ) – Dôs a son lis animis di Davide: une profonde e riflessive, graciis ae sô lauree in filosofie, e une plui lizere e creative, che si pee al mont de art. Al à imparât di bessôl la tecniche dal ecuilibrisim, de manipolazion dai ogjets e al è stât un dai pionîrs di cheste art intal mont furlan, dulà che al è stât bon di puartâ e meti in vore dut ce che al à imparât tes scuelis ator pal mont. Il so al è un vêr lavôr di artesan, dome che, invezit che i materiâi, al dopre i cuarps e i moviments di acrobats e gaugars.
      Visite la pagjine dal Circo all’inCirca
      

      Federico Scridel (atôr) – Il talent comic al è un talent naturâl e gjenetic, no si pues imparâlu cu la tecniche. Chest al è ce che Federico al à imparât fasint la academie di teatri. Alì al à podût perfezionâ la sô capacitât naturâl di jentrâ in sintonie cul public denant di lui, soredut cui fruts. Al è impegnât cun produzions indipendentis, ma tal stes timp nol mole di fâ cors di teatri cui fruts des scuelis primariis e mediis: cun lôr al dopre la lenghe furlane intune maniere creative, divertente e inmagante.
      Visite la pagjine FB di Federico
      

      Martina Tavano (balarine e coreografe) – Cuant che la art e je une passion che ti cjape dute e la musiche e je la sô incarnazion plui vere, il bal al devente une urgjence di espression, une reson di vite. Al è achì che il cuarp al devente strument musicâl di ricercje, sperimentazion e studi. Cussì, balâ al è une perlustrazion infinide tra gjenars, contaminazions, lengaçs, dissiplinis. Martina e je une balarine, performer e mestre.

    CREDITS:
    Regjie: Dorino Minigutti
    Sogjet: Giorgio Cantoni, Dorino Minigutti
    Diretôr de fotografie: Debora Vrizzi
    Assistent operadôr: Francesco Snidero
    Fonic: Francesco Morosini, Havir Gergolet, Marco Cecotto
    Runner: Filippo Minigutti
    Montaç: Andrea Guarascio
    Assistents al montaç: Lorenzo Fabbro, Rebecca Colle
    Musichis: AA.VV.
    Ricercjis: Giorgio Cantoni
    Web: Remigio Guadagnini
    Social web: Elena Buzzinelli, Sergio Floriani
    Formât: Full-HD/4K
    Durade: 13′
    Numar pontadis: 5 par serie (15)
    Lenghe origjinâl: furlan
    Sottitui: talian
    Produzion: Agherose srl
    An di produzion: prime serie 2016, seconde serie 2017, tierce serie 2018
    Progjet realizât cul contribût di: ARLeF – Agjenzie Regjonâl pe Lenghe Furlane e Font regjonâl pal Audiovisîf

    Imagjins