La Lavagne Plurilengâl

Promovi la diversitât linguistiche tant che imprest formatîf e didatic.

“La Lavagne Plurilengâl” al è un progjet de Societât Filologjiche Furlane, nassût intal 2016, che al à tant che obietîf la promozion, la cognossince e la valorizazion de diversitât linguistiche, in particolâr de lenghe furlane, tant che imprest formatîf e didatic.  

Il progjet si zove de poie de ARLeF e de colaborazion de Societât Sientifiche e Tecnologjiche Furlane, de Universitât Ca’ Foscari di Vignesie, de Pädagogische Hochschule Kärnten, de Universitât dal Friûl e dal Ufici Scolastic Regjonâl dal Friûl-Vignesie Julie (USR-FVJ).

Il progjet al cjape dentri la organizazion di laboratoris didatics inovatîfs, basantsi su la colaborazion sinergjiche fra diviersis scuelis di secont grât dal teritori e istituzions che a lavorin intal setôr de formazion dai docents, de tutele e de promozion dal patrimoni linguistic furlan.

La ufierte laboratoriâl e je une vore svariade e e svante ospits che di timp a operin in maniere ative in diviers setôrs de lenghe furlane, che a proponin aes scuelis e ai students aprofondiments ancje relatîfs a tematichis extracuricolârs.

Cul obietîf principâl di sensibilizâ l’insegnament de lenghe furlane intai istitûts superiôrs dal teritori furlan, il progjet al vûl creâ une oportunitât di valorizazion de lenghe furlane intun spirt di viertidure plurilengâl e multiculturâl, daûr di une vision europeane.

“La Lavagne Plurilengâl”, cun di plui, no dismentee la dibisugne di atualizazion tecnologjiche e di contignûts tal proponi la lenghe furlane intai laboratoris, doprant un sît web e materiâi in linie.

Une ufierte impuartante e je risiervade ai docents: par lôr e je la pussibilitât di sperimentâ un percors di formazion linguistiche e metodologjiche daûr de impostazion CLIL (Content and Language Integrate Learning), furnint poie e la implementazion des competencis e des disponibilitâts presintis intal cuarp docent de scuele secondarie di secont grât.