La Leture continue de Bibie par furlan e je stade organizade intal 2011 a Udin de ARLeF – Agjenzie Regjonâl pe Lenghe Furlane, de Provincie di Udin, de Arcidiocesi di Udin, de Associazion Culturâl Glesie Furlane, cu la adesion des Provinciis di Gurize e di Pordenon, de Arcidiocesi di Gurize e de Diocesi di Concuardie – Pordenon e il patrocini de Regjon Friûl – Vignesie Julie e dal Comun di Udin.
La iniziative e à rapresentât un avigniment unic intal so gjenar, stant che e je stade la prime volte che il test de Bibie al è stât let in maniere integrâl, e in maniere continuative, siet dîs su siet, cence interuzion, intune lenghe minoritarie: 140 oris totâls, siet dîs e sîs gnots.
La particolaritât dal avigniment e je stade confermade dai stes ideadôrs francês de leture bibliche continue, Norbert e Dominique Exbrayat, che a gjestissin il progjet di “Le Bible en continu”, esperience che aromai e fâs di coletôr par chês altris iniziativis dal stes gjenar. In Italie iniziativis similis a son stadis fatis in lenghe taliane a Mantue, Rome, Bologne e San Giovanni Rotondo.
La leture de Bibie in lenghe furlane e à rapresentât un omaç, in plui che al Test Sacri, ancje ae tradizion de Glesie di Aquilee, metint adun lis lidrîs linguistichis, religjosis e culturâls dal teritori furlan.
La realizazion dal event e à domandât un sfuarç grant dal pont di viste de promozion, de organizazion e dal coordenament, ma la rispueste popolâr e je stade straordenarie: al sucès de manifestazion a àn contribuît sogjets publics e privâts, une vore di volontaris cun diviers rûi e un grant numar di letôrs, plui o mancul mil e tresinte, in maniere singule o in grup, di ogni etât e apartignince sociâl, che ur è stade dât di lei un pas dai tescj sacris dai 3 ai 10 minûts di durade. Ae leture a àn partecipât in streaming ancje letôrs argjentins di divignince furlane e tantis personalitâts publichis de Glesie, de culture e des istituzions dal Friûl.
La iniziative e je scomençade, in maniere simboliche, domenie ai 3 di Avrîl – Fieste de Patrie dal Friûl – e si è sierade sabide ai 9 di Avrîl dal 2011, li de Glesie de Puritât di Udin. Dut l’event al è stât regjistrât, documentât, mandât in streaming – 24 oris su 24 – e in direte radio de emitente Radio Spazio 103.
-
EVENTS COLATERÂI
Par insiorâ la Setemane di La leture continue de Biblie par furlan, cul intindiment di valorizâ ancjemò di plui la manifestazion e la sô sede, la Glesie de Puritât, a son stadis organizadis trê iniziativis colaterâls.
Ai 3 di Març dal 2011 si è fat un incuintri organizât di Glesie Furlane “La Bibie par un Popul”, là che a son intervignûts i protagoniscj e i colaboradôrs de Bibie par furlan: pre Roman Michelotti e pre Antoni Cappellari, components de comission e amîs personâi dal tradutôr pre Antoni Beline, e bonsignôr Duilio Corgnali, che intal 1977 al jere vicjari episcopâl pe culture de Arcidiocesi di Udin e coordenadôr de Comission interdiocesane dai bibliscj e teolics pe preparazion de Bibie, che al è stât il protagonist dal ricognossiment uficiâl dal test.
Ai 17 di Març dal 2011, simpri dongje la Glesie de Puritât e par cure dal diretôr artistic dal event, Federico Rossi, al è stât organizât un incuintri dal titul “Un Popul cu la sô Bibie” su la impuartance de dimension antropologjiche e de identitât culturâl intal orizont universalistic de Bibie, cun: bonsignôr Rinaldo Fabris, docent di esegjesis biblichis e president de Associazione Biblica Italiana e il prof. Franc Fari, neuropsicolic e docent di neuropsichiatrie infantîl te Universitât dal Friûl.
Ai 26 di Març dal 2011, l’Arcivescul di Udin Andrea Bruno Mazzocato si à cjatât cui letôrs volontaris par un moment di ringraciament, di preparazion e di condivision.
A un an de leture, ai 27 di Mai dal 2012, e je stade organizade li dal Teatri Zuan di Udin, une serade par premiâ i letôrs e i partecipants ae organizazion e par distribuî a ducj il cd cul video de leture e la publicazion “Bibie par un Popul”, a ricuart dal grant event de “Leture continue de Bibie par furlan”.
