Il Friûl-Vignesie Julie al è un teritori tant siôr di lenghis, art, culture, tradizions, bielecis naturâls e produzions enogastronomichis famosis in dut il mont.
Al esist un mût diferent e plasevul par scuvierzi chest teritori, cjapât dentri tra mârs e monts, cenglât di culinis verdis e dolcis, e cuei dorâts dai vignâi, al confin cu la Austrie e cu la Slovenie, e al è chel di vivi lis grandis manifestazions organizadis, dilunc dal cors dal an, par valorizâ lis particolaritâts de regjon: apontaments che a riclamin la curiositât e la partecipazion di miârs di personis ancje di fûr regjon.
Il leam fuart tra il teritori furlan e la sô lenghe – e lenghis – al à stimolât la ARLeF – Agjenzie Regjonâl pe Lenghe Furlane a impegnâsi par sigurâ la sô presince e colaborazion ai events publics plui partecipâts dal an. L’obietîf de Agjenzie al è chel di lâ fûr dai lûcs istituzionâi e presentâsi sul teritori, intai avigniments di plui partecipazion, par promovi e par valorizâ la lenghe furlane in maniere direte e apassionante intune gnove sinergjie fra politiche linguistiche e promozion dal teritori.
La colaborazion cui sogjets e i cui ents organizadôrs e permet ancje di rinfuarçâ la presince e l’ûs dal furlan inte comunicazion e intai materiâi promozionâi des manifestazions, intai menûs, inte promozion dai prodots locâi e intal paisaç visîf de fieste cun grafichis plurilengâls, e un bancut di grant impat comunicatîf dedicât ae Agjenzie. La postazion de ARLeF dentri des manifestazions, individuade dal sproc “La Agjenzie Regjonâl pe Lenghe Furlane tal mieç di int”, e permet di distribuî materiâi informatîfs e promozionâi, struments informatics pe lenghe e gadget par grancj e picinins. Di là di chest, la Agjenzie e partecipe aes Manifestazions proponint diviersis ativitâts leadis ae lenghe, ae musiche, ae cusine, e, pai fruts, presentazions di libris, leturis animadis e laboratoris creatîfs.
-
vicino/lontano a Udin
Nassût di un leam fuart cu la figure dal gjornalist e scritôr Tiziano Terzani, il Festival vicino/lontano si fâs a Udin dal 2005, ogni an, intal mês di Mai. Incuintris, dibatiments, conversazions, conferencis, lezions, leturis, mostris, spetacui e proiezions a ocupin par cuatri zornadis plenis il centri storic de citât e i siei edificis plui sugjestîfs. Studiôs, gjornaliscj, scritôrs e artiscj di lustri internazionâl si confrontin tra di lôr e cul public par analizâ, di ponts di viste diferents, i procès di trasformazion in cors intal mont globalizât, tal cjamp economic, sociâl, culturâl e gjeopolitic, al fin di indagândi lis resons, i mecanisims, i significâts e lis prospetivis. La manifestazion e à ancje une sezion dedicade aes scuelis, cuntun concors a teme: la idee e je di stimolâ e di promovi dentri de scuele percors di riflession e di creativitât che puartedin ae condivision e ae comprension des tematichis frontadis. Par info: www.vicinolontano.it
-
Sapori Pro Loco a Passarian
Sapori Pro Loco e je la grande fieste des tipicitâts che si ten par doi fins di setemane tal mês di Mai inte curnîs magjiche di Vile Manin di Passarian (UD), ufrint une vetrine des particolaritâts enogastronomichis e culturâls de regjon in graciis dal impegn di dutis lis Pro Loco regjonâls. Ognidune intal propri bancut, e propon i plats carateristics de regjon, des Alps al mâr Adriatic, passant pe culine e pe planure, acompagnantju cui miôr vins dal teritori, cu lis biris artesanâls e cui prodots agroalimentârs bolâts AQUA. Tra lis esedris dal compendi dal Dôs al è pussibil fâ un vêr tour enogastronomic in miniature dal F-VJ: Sapori Pro Loco e à une valence turistiche fuarte, che si maride ben cul moviment dal turisim slow atent aes tradizions e ai savôrs dal teritori. Ogni an i miârs di visitadôrs a puedin partecipâ ai tancj avigniments colaterâi di divertiment e di aprofondiment culturâl che a vegnin organizâts pes fameis e i visitadôrs di ogni etât. Par info: www.saporiproloco.it
-
Fieste da Viarte a Cormons
La Fieste da Viarte e ven organizade a Cormons (GO) de Associazion Amîs de Mont Quarine inte penultime domenie di Mai. La fieste si fâs lunc il Cret dal Paradîs che al puarte bande la cime de mont Quarine, ritignût tant che un lûc centrâl inte storie de citât di Cormons e par chest meritevul di tutele e valorizazion. Il tiermin “viarte”, al significhe Primevere, ma ancje viertidure: cun cheste fieste si celebre la rivade de biele stagjon fasint une fieste ‘vierte’ dulà che lis cjasis privadis par chê zornade a vierzin i lôr curtîi, ufrint ai visitadôrs gustâs tipics furlans, vin e bevandis. Par dute la zornade, lis variis stazions de fieste, dal centri storic e par dut il percors che al puarte ae cime de mont Quarine fin ae glesie, a son animadis di concierts, bai, visitis vuidadis, mostris, spetacui, bancuts, animazion, leturis e zûcs pai fruts. Par info: www.fiestedaviarte.org
-
Folkest a Spilimberc e ator pal Friûl
Folkest al è un festival internazionâl itinerant di musiche folk, nassût intal 1979 tant che Fieste di Chenti e deventât Folkest intal 1984. Ogni an al cjape dentri une vore di artiscj talians e internazionâi che a presentin al public stîi, culturis e lenghis diferentis. Il Festival al propon i grancj concierts a Spilimberc e chei itinerants ancje fûr dai confins dal F-VJ, ma al met dongje de ufierte musicâl ancje une serie di apontaments culturâi cun incuintris e dibatiments publics, presentazions di novitâts editoriâls, produzions di progjets speciâi e concors. Une atenzion particolâr, za dal prin an dal festival, e je dade ai artiscj e ai grups locâi: cul sproc “La musiche dolce di une lenghe fuarte”, nassût de colaborazion cu la ARLeF, la Associazion e met dongje de ufierte musicâl tradizionâl par furlan ancje iniziativis e materiâi promozionâi in lenghe locâl. Par info: www.folkest.com
-
Avostanis/In file a Vilecjaze di Listize
Ogni an, dal 2005, a Vilecjaze di Listize (UD), lis seradis dal mês di Avost a animin la arie dai Colonos cun incuintris tal viert, spetacui, concierts e mostris che a fasin part de rassegne Avostanis organizade de Associazion Culturâl Colonos par dâ visibilitât a personaçs e a progjets dal senari furlan e par stimolâ riflessions e dibatiments. Fra i varis apontaments, ancje chel organizât in colaborazion cu la ARLeF, “Provis viertis di culture furlane” che si ufrìs tant che osservatori par rifleti, traviers une serie di progjets in cantîr no ancjemò concludûts, su cetant che e sedi vive e ecletiche la culture furlane in dutis lis sôs espressions creativis, e in cualis direzions che e je daûr a movisi. Dal 2008 ai Colonos si ten ancje la rassegne invernâl In File che, disvilupantsi su un teme che al cambie di an in an, e propon, dentri de vecje stale, incuintris, dibatiments, proiezions, mostris di art, workshop, concierts e concors su la culture furlane e sul teritori cuntune vision slargjade, sinergjiche e vierte aes contaminazions. Par info: www.colonos.it
-
Friuli Doc a Udin
Friuli Doc e je une tra lis manifestazions plui grandis e amadis in Friûl. Ogni an, dal 1994, dilunc des primis setemanis di Setembar, par cuatri dîs, la citât di Udin e devente une vere vetrine par presentâ e par fâ cognossi il miôr de produzion enogastronomiche e artesanâl, artistiche e culturâl di dute la regjon. Tancj e sorprendents a son i ponts principâi di un program une vore siôr: intai bancuts e intai stand, intes placis e intes viis dal centri, si puedin cerçâ i prodots tipics furlans, i vins, lis sgnapis e tant altri. La ocasion golose di cerçâ i tesaurs de enogastronomie furlane si lee ai tancj apontaments cun mostris, spetacui, cunvignis, cors di cusine, cercis vuidadis, dimostrazions e laboratoris, spetacui di strade, laboratoris didatics par fruts, leturis, concors, musiche, esposizions artistichis e produzions artesanâls. Friuli Doc al è un viaç intal gust e intai savôrs plui golôs dal F-VJ, un vere misture par cognossi ogni particolâr di cheste regjon multilengâl e ospitâl, plene di art e di culture. Par info: www.friuli-doc.it
-
Gusti di Frontiera a Gurize
Dal 2003, ae fin di Setembar, si ten a Gurize Gusti di Frontiera, un fra i events enogastronomics plui impuartants dal Friûl-Vignesie Julie, che al trasforme la citât intun mapemont in miniature dulà che i visitadôrs a puedin cerçâ lis specialitâts che a vegnin des regjons talianis e dai varis paîs europeans e dal mont fasint pardabon un “viaç dal gust”. Graciis ae presince di plui di 300 bancuts enogastronomics in rapresentance dai cinc continents dal mont, ripartîts in diviers Borcs gjeografics e ae impostazion multiculturâl, la manifestazion gurizane e clame ogni an un public tant larc che al ven ancje di fûr regjon. A insiorâ la fieste a vegnin organizadis tantis iniziativis cun presentazions, concierts e spetacui, ancje par fruts, ospitâts dai varis Borcs. No puedin dal sigûr mancjâ i chef famôs che a intervegnin intal “Salotto del Gusto”, contignidôr culturâl di ecelence, dulà che si fasin conferencis, showcooking e incuintris, cul obietîf di aprofondî i aspiets plui interessants de cusine. Par info: www.gustidifrontiera.it
